O le fetufaaaiga o manatu anoa ma finagalo e fuafua ai ni auala e tali atu ai i suiga maaleale ole tau, na afua ai ona faatautaia se polokalame mo le tolu aso ile ofisa a le SPREP (Secretariat of the Pacific Regional Environment Programme) i Vailimavanilla amata atu ile Aso Lulu o le vaiaso nei seia aulia le aso faraile ole vaiaso lava nei.
O le auga o lea faamoemoe ina ia auai Matagaluega uma a le malo oloo galulue e foia faafiatauli o suiga ole tau, ma ia ausia le faatauaina o aia tatau a tagata soifua mo se siosiomaga manuia ma soifua maloloina.
Ole manatu na auau iai lea talanoaga ua faaperetaniaina, “Advancing a human right based approach to climate actions”, pe ua faasamoaina, “Faaleleia o auala e foia ai aafiaga o suoga ole tau, e Faavae lea i luga o aia tatau a tagata soifua “.
Na faatautaia lea polokalame e le ofisa o sulufaiga, o se tasi lea o ofisa e faatauaina aia tatau a tagata lautele i lana faigapaaga ma le Matagaluega o siosiomaga ma punaoa faalenatura (MNRE).
Ua faatupeina lenei tauaofiaga e le Iuni a Europa (European union) SPREP e tauala mai ile PCCC (Pacific Climate Change Center ma le Asia Pacific Forum.
O nei fuafuaga uma ua faia ina ia fesootai aia tatau faatagata Soifua ma le faatinoina o auala e foia ai aafiaga ogaoga o suiga ole tau, ina ia maua e tagata uma se siosiomaga mamā ma soifuamaloloina mo le soifua manuia o tagata.
Ma o se tasi foi lea o manulauti a malo aufaatasi.