Tali atu a le Matagaluega o Galuega i aafiaga o Salafai i lologa

SHARE NOW

Ua faailoa faalauaitele mai e le Minisita o Galuega ma fela’uaiga i luga o alatetele, LTA, Olo Fiti Afoa Vaai, galuega sa faatino e le Matagaluega, ile vaiaso talu ai na aafia ai Savaii i timuga ma lologa, ae o tafega, ile faaitu i Fasalalelega, pei o Sapapalii ma Lano. 

Saunoa Olo, sa iai tulaga maaleale ile faatinoga o galuega faaleleia ale aufaigaluega  i lena taimi ina ia vave ona toe maua feoaiga, ole uila ae ole suavai i vaega o le motu na aafia. 

O tulaga masani lava o aafiaga faapea faanatura, pei ona faailoa e le Minisita, sa taape vave atu lava le aufaigaluega e mata’utu, vaega ua faaleagaina, ae ole saogalemu ole auala, ma se faiga e mafai ai ona feoa’i i taimi ole maligi o timu, ma ta’u atu i luga o le FB ale Matagaluega i vaega o le motu e tatau ona faaetete iai, taumamao mo le saogalemu. 

 Ile pepa o le faamatalaga faalauaitele a le Afioga a Olo, o ia ta’ua ai ole taimi lava na maui ai le vai, taape loa le aufai moli EPC, ole Pulega o le Suavai ma le aufai auala LTA e faamaumau aafiaga ae ole toe faaleleia. 

 Ma amata ai lava galuega , pei o le toe soo atu o aiga i vai mama, ae ole uila. 

O le taimi foi lena na amata ai ma le LTA e fau auala le tumau e feoai ai mo le toe fausia o ala tetele na motusi. 

 Molimau Olo e ta ane lava le tolu ile vaveao o le Aso Tofi o le vaiaso talu ai faatoa manava le aufaigaluega sa taumafai e toe faafoisia manaoga talafegai i aiga na afaina. 

Ma oo atu ile taeao o le aso Faraile, 9 Iuni 2023 ua tele ina maua le vai mama a aiga, ole uila ma auala le tumau. 

Sa la malaga atu foi ma le Ofisa Sili o le LTA e mulimulitaia galuega na tali vave atu ai, ae o le amata ai loa foi ona faataatitia fuafuaga mole toe faaleleia. 

 Saunoa le Minisita ia Olo o taimi faapea o mafatiaga ao aiga na aafia ae o se faapopole foi i o latou aiga i atunuu e mamao, e taua ai lava le galuega a le aufaasalalau, ina ia mafai ona faalauiloa ala e puipuia ai soifua manuia, saogalemu, ma nofoaga e maua ai fesoasoani mo aiga aafia, ae o faamatalaga moni ma le sa’o mo le silafia o tagata lautele. 

Ma ia faafetaia ai le galuega a le pulega o le felauaiga, LTA ma galuega tetele, aemaise o le aufaigaluega ile latou tali vave atu i taimi o puapuaga pei ona iai ile vaiaso talu ai.