Ua tali faalauaitele mai nei le pulega o le Lakapi Samoa, ile faamatalaga faalauaitele a le alii taaalo ia Elijah Niko, ole vaiaso talu ai, O le tala a Elijah sa ia fautuaina le pulega e tagai i totogi ia toe siitia, o le fiaaai o tama taaalo i mea e malaga iai, pei o Fiti ma Dubai, ae o avanoa konekarate mo tama lakapi, e aofia ai ma le konekarate na faaleaoga e le pulega, ma le nonofo ole pulega o le au i luma ae nonofo i tua le aulakapi i taimi e malaga ai i vaalele.
Ole faaiuga o le vaiaso na tali ai le pulega o le Lakapi Samoa ma avea ai foi ose laasaga e malama ai le tele o mataupu o laga e le tama taalo a le Manu Samoa, ma ua le tasi pe lua tama taaalo ua latou faia nei lava ituaiga o faamatalaga ile pulega.
Ae maise o le itu tau i totogi.
Peita’i ole tele o faamatalaga a Elija i luga o fesootaiga televave, o loo teena malosi e le pulega o le Lakapi Samoa, pei ona taua ile pepa o faamatalaga, ae ose tala a le faiaoga ulu, Muliagatele Fata Brian Lima o loo ia teena ai e le moni ni tuuaiga o faia e Elija.
Peita’i ile faamatalaga faalauaitele mai le Pulega o le Manu Samoa poo le Lakapi Samoa, o ta’ua ai ile faamatalaga faaluaitele lea, ua lagona atu mataupu lea o loo laga ane e Mr Niko, ma fautuaina ai le alii taaalo e faaui ane ile ala o mea, pei o le avatu i le pulega o le au, poo le Lakapi Samoa, ma le Asosi a tama taaalo.
Peita’i ua mafai ai nei ona faailoa faalauaitele mai ai e le pulega tupe maua a tama taaalo, o le au lava ia e 18, e tai $300 ile vaiaso. o le vaega o loo tapena mo le 18, e $150tala ile vaiaso.
O tupe faaleoleo poo allowance mo tama e toa 14 i taimi mo le tornament poo le taamilosaga. Ae o isi tama taaalo, e maua latou tupe $15,600 ile tausaga.
Ae mo tama taaalo o tapena mo le au, e maua latou alauni tai $7,800 ile tausaga. poo le 150tala ile vaiaso.
Ae mo tama e fili mo le au ma malaga i taimi o taamilosaga uma ma isi taaloga faataamilosaga ma taaloga faaopopo, e $32,000 alauni ile tausaga.
O tupe maua mai tagata ma faalapotopotoga a Samoa e avatu i le Manu Samoa fitu, i taimi o ana malaga e ave sa’o lava iel au ma le pulega ma faaopopo ai foi i tupe maua a tama taaalo.
Ae o tulaga tau i meatausami a tama pei ona molimauina e Mr Niko i Fiti ma Dubai, o ta’ua e le pulega, ua faatulaga lava taumafa paleni mo le au.
Ae sa faamaonia le taofia e le pulega o le oka o meaai i le taimi oi Dubai talu sa oka faatasi ane ai ma ‘ava, ae le faatagaina.
