Tali mai a le Komesina o leoleo Auapaau Logoitino Filipo, i faasalalauga o agia i luga o fesootaiga televave, o ta’ua ai le faia pea o suesuega a leoleo ile tagata na so’aina Tuuau Maletino i Vaitele, ile 2ma le afa tausaga talu ai, ma maliu ai.
Ole tali ale komesina i luga o le itulau a lana Matagaluega Leoleo, o atagia ai lona faia ole faaiuga, o le molimau ua faitau tausaga o saofafa’i ai le Matagaluega o leoleo.
Molimau logologoa a Sam poo Samuelu Le’au ua faitau aso o talanoa’i paaga a le fb. Ae ile faaiuga a le Komesina, o ia saunoa, ua faamaonia ele ofisa o leoleo Samoa, e leai se faamaoniga o tuuaiga o loo agia i luga ole fb, e le sa’o, e feososofa’i solo, ma e le’o mafai ona iloa ai se tagta o masalomia, e aofia ai ma le tuuaia o leoleo i le faatinoga o latou galuega.
E oo mai nei e leai se isi ua taofia, pe molia, ina e le’o talitonuina e le Komesina molimau a Samuelu. Ole maliu faafuasei o Tuuau na amata mai ole Van le taavale na avane i luga e leoleo sa masalomia.
Ole taunuuga foi lena o le suesuega tumaoti sa fesoasoani atu ai paaga a le aiga o Tuuau, ma sa ave uma lava i leoleo ile lua tausaga talu ai.
Peita’i, o molimauina e le aiga o Tuuau, ole tausaga talu ai, na toe oo atu ai leoleo mo nisi faamatalaga, talu faapea ua leiloloa faamaumauga muamua.
Ile tatou tuliloaina pea o le mataupu lenei, e oo lava ile taunuuga o le suesuega a tagata faapitoa mai Saina, e oo mai nei, o ta’ua e le Komesina, na avatu uma ile Loia Sili, le faila.
Ole tamaitai sui Komesina ia Papalii Monalisa sa taitaia le suesuega ole mataupu a Tuuau, pei ona saunoa Auapaau. Ole mapuna ane ole molimau a Samuelu, lea ua saunoa le Komesina, e le talitonuina, peita’i nate le’o mafai ona faailoa mai le mafuaaga.
I faamaumauga a leoleo, ua maua ai sa falepuipui lea tagatanuu Samoa, i moliaga ole gaoi ma le talepe fale, ile 2010, sa ma loka ai ile ono masina.
Ua silia i le 10 tausaga o mama pea le faila o Samuelu pei ona molimauina i faamaumauga a leoleo.
Ole afigoga ile Palemia le tumau, Tuala Iosefo Ponifasio o avea ai ma Minisita le tumau o le matagaluega o leoleo. na tatou fesiligia ilenei mataupu ma ia saunoa, a taga’i iai le malo ile taimi nei.
