9 Ianuari 2025, Samoa: Tala tuliloa mai le faigamalo a le FAST,
O le malepe ma le maopopoga ole taitaiga a le faigamalo a le FAST e faalagolago i lona taitai, pei ona saunoa le matai mai le itu o Salega le tofa a Falefata,
Na afua lea tagi aue ina o lea ua atoa le vaiaso o faapupula lava le atunuu i foliga le mautonu o le faigamalo a le FAST o iai ile taimi nei.
Talu lava le sailiga o le tagata na maliu ai le tama aoga o le Iunivesite, ia Tuuau Maletino.
Peita’i ua tuu le sailiga o le avetaavale na lavea ai Tuuau ae ua faia su’esu’ega i faamatalaga e sootaga ile maliu.
Pei ona faia ai moliaga e 10 ile Laaulialemalietoa Polataivao Fosi Schmidt, faapei foi ona molia ai lesi faipule o le FAST, ma le sa avea ma leoleo sinia, ole ulugalii, ma le tamaitai aoga o le Iunivesete o loo ave lana mataupu faatusitala.
E pogisa ifo lava ananafi e leai se faamatalaga faalauaitele mai le Ofisa o le taitai o le malo, le Palemia, Fiame Naomi Mata’afa,
E faapena foi ona leai se faamatalaga faalauaitele mai le taitaifono o le FAST, susuga ile Laauli ile taunuuga o le latou fetuuinaga.
Lea na agia muamua mai ua mae’a ona fale ma faalelei mai le uma ane o le fono 6 itula ile aso Lua 7 Ianuari, 2025 o le a agai i luma, ma tatou ulua’i lipotia atu, ile taeao ananafi, Aso Lulu 8 Ianuari 2025.
Peitai o le tala mai le tatou paaga e sootaga ile pulega ole faafaletui a le FAST, e oo ane ile aoauli ua toe sui foi le tala a le afioga ile taitai o le malo le Palemia.
Ua toe finagalo foi e aveese lava le tofiga Minisita mai ia Laauli, e ui ina folasia le finagalo o le vaega faaupufai e lagolago le tuu ai pea ole tofiga Minisita o Laaulialemalietoa ma avea pea ma taitai fono ole faafaletui.
O le suiga lena mai ananafi, pei ona taua e le tatou paaga, o loo latou talia ai se faamatalaga aloaia, tusitusia ane a le afioga ile Palemia, i le tulaga ua iai lona finagalo, e oo mai ai ile taeao nei, o loo talia pea e le FAST se faamaumauga aloaia poo se tusi atu a le afioga a Fiame Naomi Mataaafa i lana vaega faaupufai, o loo faatali.
E le’i maua lava se tatou feiloaiga ma le Susuga ile Laaulialemalietoa, ae ole failautusi a le vaega faaupufaia le FAST, peita’i o le tala mai le tatou paaga i totonu, e iloa lesi laasaga, ise tala atu i lo latou taitai.
O iiina e iloa ai foi, ma le faia ose faatatau ile afioga ile tamaitai Palemia, e fua i sona finagalo tusitusia e tuuina atu i lana vaega faaupufai.
O loo talia pea se tali mai le failautusi a le ofisa o le Palemia, na tatalo iai le Peretene o tusitala a Samoa, Lagi Keresoma mo se feiloaiga a le taitai ma le aufaasalalau faatatau ile mataupu lea o agiga i luga.
