Talia se tali a le tamaitai Palemia poo ai faipule ua lagolagoina lana faaiuga e faatea ese Laaulialemalietoa mai lona tofiga Minisita.

SHARE NOW

14 Ianuari 2025 Samoa: O le ta o le 12 ile aso, 14 Ianuari, 2025 e feiloa’i ai le vasega o tusitala ma le afioga ile Palemia, Fiame Naomi Mataafa, talosia e nate faailoa mai ai suafa o faipule ua faasee atu e lagolago lana faaiuga e faate’a ese Laaulialemalietoa mai lona tofiga Minisita o  Faatoaga ma faigafaiva.

Peita’i ole tusi lea sa avatu e le faafaletui a le FAST ile afioga ale Palemia, ma saini ai faipule ole FAST, o atagia e le’i iai se faatalanoaga auiliili sa faia faatasi o lena tusi.

Vagana ai le valaauga o faipule e auaua’i  taito’atasi, atu ile ofisa o le Palemia ananafi ma faatalanoa ai.

Ae emo ane ai le taunuuga o lena faatalanoaga, e iai faipule na latou saini le tusi, e tetee ai ile faaiuga a le Palemia, ua toe foi atu nei e lagolago lana afioga, ile uma ane o le faatalanoaga.

O ta’ua e le tatou paagaa e sootaga i le pulega o le FAST ina ua tatou fesiligia, o le afioga ile Minisita ole Soifua Maloloina ia Valasi Togamaga Tafito sa saini ile tusi, peita’i na faaoo ane lana tausi aloaia ile pulega ole FAST, ananafi, 13 Ianuari, e aveese ai lana saini mai le tusi.

O isi faipule e le’i oo ane, ile fono ae o loo saini ile tusi, o taua e le tatou paaga, ua ofo atu iai tofiga minisita e faatumua le nofoa o Laaulialemalietoa, ile matagaluega o faatoaga, o lesi mo le nofoa o Toelupe Onesemo mo le matagaluega o Fesootaiga,  o lesi mo le nofoa o Mulipola Analosa Ale Molioo, ma le nofoa o Leota Laki Lamositele Sio.

O atagia mai foi i le faasoa mai a le tatou paaga, o faipule ua tofia mo nofoa o Minisita mai Savaii, ia Laauli, Leota ma Mulipola, o faipule lava foi mai Savaii. Faapena foi ile nofoa ole minisita o Toelupe ua tofia atu foi iai le faipule o Upolu.

O se taimi ona tou faafofoga lea i taualumaga o lena suiga tele ua iai nei ile faigamalo a le FAST.

Ae mo le taimi nei, ua taoto mai ile 22 faipule o loo latou teena pea faaiuga a le Palemia e faate’a ese Laauli ma le Kapeneta.

Talu o loo loma moliaga a leoleo faasaga ile Susuga a Laauli, e sootaga uma ile sailiga o le avetaavale na maliu faafuasei ai Tuuau Maletino o le Iuniveste Aoao a Samoa ia Aperila 21, 2021.

O le vaeluaina ma fetotoa’I  ai o le FAST, ile taimi nei, ae ua toe tausaga mae’a lana pulega ole faigamalo muamua,

Ua fesiligia ai nei e le toatele lesi laasaga, talu ole tele o faipule o le FAST o lo o tetee ile pulega ale afioga ile Palemia.

O loo mautinoa lava mai le amataga o le FAST sa iai ana loia faapitoa, e aofia ai le sa avea ma Loia Sili ale malo, afioga Brenda Heather Latu ole Latu law, o le afioga a Mauga Precious Chang, o le Mauga Lui Law, ma isi.

E le’i maua ia se tatou avanoa e fesligia ai ofisa loia o taua i luga, i ituaiga o fatutuaga faaletulafono o latou tuuina atu ile palemia ma lana faigamalo.

Ae mole taimi nei, ua toe tolo atu ile 12 ile aoauli le feiloaiga a le Palemia ma le vasega o Tusitala, mo le silafia ole atunuu.