Na tatala aloaia i le Aso Tofi o le vaiaso nei le fonotaga a le Matagaluega o tupe ma ana paaga o loo latou galulue faatasi e vaailiili taiala talafeagai mo galuega faavaitaimi.
O se taimi muamua lenei ua faia ai se fonotaga faapenei, ina ia soalaupule ai manatu o sui taitasi, e sootaga i taiala ma faavae ua mae pasia nei e le Kapeneta mo le lima taitaia o fanau o loo maua avanoa i galuega faavaitaimi i Ausetalia ma Niusila.
Aua o lea ua faasee atu i tua i fonofaavae ma itumalo faapalota taitasi le filifiliina lea o fanau latou te iloa e alagatatau iai avanoa mo le sailiga o manuia o aiga ma nuu.
Ae nafa le Matagaluega o tupe ma ana paaga lagolago e faaleleia atili ma faamalamalama atili taiala eseese ma o latou taunuuga.
O loo tumau lava le faatapulaaina lea o fuainumera o avanoa o tagata Samoa e tatau ona malaga i galuega, pei o Ausetalia e 6,000 ma Niusila e 6,000.
Peitai e leo mafai ona ausia e Samoa na fuainumera, pe a le faamalieina lava aiaiga ma lipoti o le tagata o loo talosaga atu.
O galuega faavaitaimi e na o tagata ua faamauina e le Malo e leai ni galuega e maua ai se seleni e tausi ai o latou aiga e agavaa ona malaga i nei galuega, ae ia i le va o le 21-40 le matua, faamaoni ma amio pulea.
Pei o le aumalaga a le afioaga o Poutasi Falealili lea na malaga ai le isi toa 100 i Niusila i le vaiaso ua mavae, 31 na malaga le Aso Gafua mo Ausetalia, ma le toa 40 lea ua faamoemoe mo Niusuila i le Aso ananei.
