Talosaga le itu leoleo e toe faaui tua moliaga 81 ae suia i le moliaga e tasi o le gaoi ao avea ma tagata faigaluega o le susuga ia Sara Skelton.
O le tamaitai sa faauluulu iai vaega o tupe (finance) ma auaunaga lautele (corporate services) a le matagaluega o Faamasinoga, o loo tuaia le to’esea o se seleni le matagaluega.
I le valaauina lenei mataupu i le vaiaso ua mavae na talosaga ai le itu leoleo ina ia toe faaui i tua moliaga 81, peitai na poloaina e lana afioga le faamasino Justice Leiataua Daryl Clark, ” e tatau i le itu a leoleo ona tuuina atu i luma o le faamasinoga ni mau maumautu’tu.
E lagolago ai le talosaga, aemaise le tatau lea le itu a leoleo ona tuuina atu se talosaga tusitusia ae leo le talosaga tuu’gutu e pei ona faaleo atu e le tamaitai loia o le itu leoleo.”
I faamaumauga a le itu a leoleo na tuuina atu i luma o le faamasinoga e $20,000 le aofai o le seleni o loo tuaia ai Sera Skelton, peitai o le valaauina o lenei lava mataupu i le amataga o le tausaga nei na faailoa ai e le itu a leoleo e silia ma le $300,000 le aofai le seleni o loo tuaia ai.
O le amataga foi o le tausaga nei na faailoa ai foi e le itu a leoleo le faaui ai lea i tua o moliaga se tasi o le tamaitai o le Matagaluega o Faamasinoga sa tuaia faatasi ma Sera.
Ae avea ai lea tamaitai ma molimau autu mo le itu leoleo i lenei mataupu, o loo talia nei se tali a le Faamasinoga Maualuga i le talosaga a le itu leoleo.
O lenei mataupu ua savalia nei le lima tausaga talu ona tulai mai ma faamalolo ai le tamaitai o Sera Skelton mai lana galuega.
O le alii loia ia Quentin Sauaga o loo tulai mo Sera Skelton, ae o loo tatala pea i tua le tamaitai o Sera e talia ai pea le faagasologa lana mataupu.
