O loo taofia pea le alii o Samuelu Su’a ile aai o pagota i Tanumalala e faatali ai le toe valaauga o le latou mataupu ile masina o Me ole tausaga nei.
Peita’i o loo taatia ai nei ile faamasinoga le talosaga a Samuelu mo le faasee ese lea ole Afioga a Talasa Atoa Saaga mai le faamasinoina o le latou mataupu.
Ole talosaga a Samuelu na faaui atu i lana loia, Fetu Lagaaia, peita’i talu ai, e le’i auai uma loia a itu o lenei mataupu, ae o isi molia faatasi ai e leoleo, na le taunuu ai ona faia se faaiuga, ile talosaga o ta’ua i luga mo le faasee ese ole afioga ile Faamasino Judge Atoa Saaga.
Ole mataupu lea e sootaga ile maliu lilo o Tuuau Maletino, o le NUS ile aualatele i Vaitele ile 21 o Aperila, 2021.
Peita’i e oo mai nei, e le’o iloa lava poo fea tonu ua oo iai isi tagi sa faaulu ile ofisa o leoleo, e sootaga uma lava ile maliu o Tuuau.
O na mataupu sa faato’ai I leoleo e aofia ai le tagi a le faletua o le faipule ua tuumalo ia Vaele, Afioga a Tupuola Mati, ae ole Minisita o Faatoaga, ia Laaulialemalietoa Polataivao, faatatau i faamatalaga faalele.
Ole mataupu lea o loo molia faatasi ai le leoleo Sinia Li’o Faataumalama, ole teine aoga ole NUS, ia Lise Marie Schmidt, ole faipule sa avea ma Minisita lagolago o le Matagaluega, o leoleo Fepulea’i Su’a ma le faletua o Samuelu, ia Sivai Kepi.
O moliaga e aofia ai le taupulepule ma le faalavelave i galuega a leoleo. Ole masina o Me e valaau ai, ae o talia ai se tali mo le talosaga a Samuelu e faasee ese le tamaitai faamasino o gafa ai ma le latou mataupu.
Talu le tuai ose tali o lenei mataupu, ua tusi atu ai foi matua o Tuuau Maletino ile ofisa o sulufaiga a Samoa, e talosagaina mose suesuega ile ofisa o leoleo, faatatau ile latou faatinoga ole suesuega ile maliu ole atalii.
