O se vaiaso ese lenei mo aoga tulaga lua ma kolisi uma ile itu atu i Sisifo o le motu tele i Savaii, ina mo le taimi muamua o le’a mafai ai e faleaoga ona maua sootaga aloaia i fesootaiga faaona po nei, tuusa’o ifo mai satellite ile va teatea.
O fesootaiga televave ia , e maua ai fesoasoani i tulaga tau aoaoga, aemaise ai o aso nei, i taimi o faamai ma fesouaiga o suiga o le tau ua iai le lalolagi.
Ole aso Tofi ma le Aso Faraile o le vaiaso nei, lea ua tatala aloaia ai le auaunaga lea o interneti fesootaiga faaonapo nei, Blue Wave Wifi mo aoga uma i Salafai.
Ua sili ma le masina talu ona galulue ai le kamupani a le Blue Wave, Susuga Togisala Tony Leota ma le aufaigaluega e tapena lenei faamoemoe tele mo fanau aoga ma faiaoga i le motu tele.
Ma o loo amata atu le faalauiloa ile itumalo o Gagaifomauga numera tolu, aofia ai aoga i le itu i matu ole motu faasolo atu ai i Sisifo ma toe agai ifo i Saute i le aso Faraile ma faasolo ane ai ile atu Faasaleleaga.
Ole auga pei na saunoa Togisala, e le gata ina mafai ai e fanau aoga ma faiaoga ona maua sootaga i interneti, ae o le saolotoga e faaaoga ai e aunoa ma se popole ini ata palapala poo ni fesootaiga i aga e le tusa ai ma le laasaga o aoaoga o fanau o iai,.
Na saunoa Togisala, o le galuega lena a le Blue Wave, o le faamama o ala ata.
Ma o le’a faalauiloa ai foi le Apps poo le polokalame faapitoa ua latou faaaoga e faamama ai polokalame e uia le faitotoa o le Blue Wave mo aoga uma a Samoa.
