Tala toe tuliloa mai Salelavalu Savaii, ua faailoa mai ai nei e leoleo le alii na faapaina le fana: Apisaloma.
Ma ua molia ai ile taumafai e faaoo le maliu, ae o Masina o loo molia i laau faasaina, peita’i e lei maua lava Manuia Lafaele ile taimi na tuufaatasi ai le tatou lipoti lenei. Ole fono a le nuu ananafi Aso Lua, lea na avane ai e le afioga o Salelavalu, le toalua, o ta’ua i luga, i masaloga ole fana faapa ma lo la sootaga i fualaau faasa.
Ole taunuuga lena o le fono a le afioga i le Komesina Auapaa Logoitino Filipo i le aso ananafi Aso Lua. O le alii lea na faapaina le fana, ua avane i luma, o Apisaloma Setu poo Sula Sete, ma ua molia ai nei ile taumafai e faaoo le maliu, pei ona saunoa ai afioga i le Komesina.
Ma e ono iai nisi moliaga faaopopo.
Faapena foi ona avane e matai o Salelavalu, Masina Lega Taulelei, ae lei maua ane, Manuia Lafaele, pei ona faamaonia mai e le Komesina o leoleo.
Ua molia Masina i le totoina ole togamaliuana, pei ona faamaonia mai e le Komesina o leoleo. Ae o Apisaloma lea o loo tuaia i lona fana ane o leoleo ile aso Toonai talu ai, i le taimi o le osofaiga ma manunua mitimiti ai le to’alua.
Peitai ole fono o le afioaga ile Aso Gafua na faasala ai le alii o loo tuuaia i le osofaiga a leoleo, lea na maua ane ai laau e 35.
O le aso toonai na o ai leoleo e tali atu ile logo ane o leoleo i Tuasivi e tagata o le nuu o Salelavalu, faatatau ile toga marijuana i le nuu.
Ma o loo taofia ai nei e leoleo le to’alua ua maua, ma ua faatulaga e tula’i ai i luma o le faamasinoga i le aso 28 o le masina nei, e tali i o la moliaga. Molimau a le afioga i le Komesina o leoleo, Auapaa, e faafetaia le latou fesagaiga filemu ma matai o le afioaga o Salelavalu.
Saunoa Auapaau, ile latou feiloaiga, ma le pulega ale afioaga, ma sa malamalama lava latou ile tiute o leoleo, o le faamalosia lea ole tulafono, ma faamautinoa ole filemu ma le saogalemu e ave iai le faamuamua i totonu o nuu.
Lona uiga e le tatau ona iai ni fualaau faasaina. Ma latou faamanatu foi ai, e leai lava se isi e sili atu i luga ma le tulafono, ma ole solitulafono foi le faalafi o le solitulafono, ma le tagata solitulafono.
Saunoa foi le afioga i le Komesina o leoleo ile faatalanoaga lava lea ma lau Leitio Polensia, Ole feiloaiga lea ananafi, ile va o leoleo ma le afioaga, e tulaga ese mai ai lava le tatou agaifanua mai isi malo o le lalolagi.
E mafai ona o tatou omai faatasi e soalaupule soo se mataupu, ava fatafata ma le va fealoa’i na lo isi auala faaletulafono.
