O loo taofia i le toese alii toatolu mai Malie ma Afega na o latou osofaia ma toesea mai mea totino e silia ma le $16,000 le tau mai le maota o le Komesina o Tineimu ma faalavelave faafuasei le afioaga ia Tanuvasa Petone Mauga.
Ma latou ioe foi i moliaga a leoleo e faasaga iai latou ina ua tulai i luma o le Faamasinoga maualuga i le amataga o le vaiaso nei.
O ia moliaga e aofia ai le ulufale faamalosi totonu o le fanua e aunoa ma se faatagana ma le gaoi poo le aveesea o mea totino.
O vaega sa toesea e aofia ai se laptop ituaiga o le Dell e $2,700 ma ni telefoni feaveai o le Galaxy Samsung 21 e $2000, ma le Samsung 35 e $1,800 pe a faatupe.
Sa iai foi ma se Note 20 e $6,000 tala faapea ma se speaker JBL, o ietoga, pusa pisupo ma lavalava, na aofia ai foi ma se tinoitupe e $400 Ausetalia ma se $90 tala Fiti ma se tupe Samoa e lei mafai ona faailoa mai le aofaiga.
Ma o le tau atoa o mea na aveesea, e $16,852.95, peitai e leo mafai ona tatala nei alii i tua, ma toe tuuina ai e le faamasinoga e nofo vaavaaia i le falepuipui.
