Na faateia tusitala sa i le fale Faamasino i le aso Lua o le vaiaso nei, ina ua faailoa mai e le loia o loo tulai mo le mataupu a alii Saina faipisinisi solitulafono, e le mafai ona lipotia le mataupu ona o mataupu faalevaomalo.
O le mataupu e sootaga i alii Saina faipisinisi se toa lua ma nisi o loo iai le piitaga i le faagaioiga o nei pisinisi faasolitulafono.
O le afioga i le faamasino ia Satiu Simati Perese o loo faafoeina le mataupu lenei, ma loia e aofia ai le alii ia Semi Leung Wai, ma le tamaitai ia Ladesha Stevenson lea o loo tulai mo alii Saina.
Peitai i le maea ai o lenei mataupu i le Aso ananafi ma savali sao mai loa le tamaitai loia lenei ma faailoa i tusitala e le faatagaina ona lipotia le mataupu o loo taua i luga.
O se taimi muamua lea ua faasa ai e se loia le vasega o tusitala ona lipotia ni mataupu faapenei, ma e na o le faamasino sili foi e aumaia le faatanaga e lipotia pe tapu foi ona lipotia ai foi nei mataupu.
Na faailoa iai e le peresitene o le vasega o tusitala Samoa na o le Faamasino sili matou te faalogo iai o ia e aumaia le faatanaga.
Ae aisea foi ua faasa ai lea mataupu ona lipotia, mai isi mataupu faalevaomalo maaleale sa masani ona faasalalau ma lipotia e tusitala.
Ma fesiligia loa e le peresitene le loia, O na fea o le tulafono o loo faavae mai ai lau mau e le mafai ona matou lipotia mataupu faalevaomalo?
Ae na tali mai le loia lenei, pau na o le tala e le mafai ona tou lipotia le mataupu lenei, ma savali ese mai loa ma luma o tusitala sa latou fetauai.
Peitai molimau tusitala lenei o ia sa tusiina le fasipepa e talosaga ai le faamasino sili e tuumai le faatanaga e lipotia ai lenei mataupu, na oo lava i luma o le afioga Perese ma ia faitauina e aunoa ma se tala na toe tuuina mai.
E toe faaauau ai le mataupu lenei e sootaga i le pisinisi faasolitulafono a alii Saina o loo faia i totonu o Samoa i le vaiaso nei.
