Ua faamaonia mai ai e le Ofisa Sili o le Matagaluega Aoga, Taaloga ma Aganu’u, le Afioga ia Aeau Chrisopher Hazelmani luga o le itulau o faamatalaga a le Malo, le iai o siuga i kuata faalea’oa’oga mo le tausaga lenei.
Pei ona iai tausaga ua mavae sa tai 15 vaiaso le kuata.
Peitai saunoa le Ofisa Sili, ua iai suiga mo kuata faalea’oa’oga mo le tausaga lenei 2023, o le kuata muamua, lua ma le tolu e ta’i 10 vaiaso e fa’agasolo ai ‘āoga ae ta’ilua vaiaso e tu’ua ai.
Ae o le kuata mulimuli poo le kuata fā e valu vaiaso e faia ai ‘āoga, valu foi vaiaso e tu’ua ai, e aofia ai le Kerisimasi ma le Tausaga Fou, ae mo fai’āoga e lima vaiaso e mālōlō ai.
O le su’ega o le S.P.E.L.L. e pei ona ia Saunoa, o le suega lea na su’e ai fanau sa i le vasega Lua.
“Ua ma’ea ona toe iloilo toto’a e le Matāgaluega aemaise i latou sa nafa ma su’ega nei, e tele lava lape ma faafitauli na tula’i mai i le taimi na fa’atino ai lea su’ega.”
“O le su’ega lea e lē o se su’ega tusitusia, e fa’atino sa’o lava e le fai’āoga ma le tamaitiiti ‘āoga e ala lea i le faaogaina o le fofoga e fesootai ai le faiaoga i le fesili ma le tali a le tamaititi.”
Na faamanino e Aeau, “E 15 i le 20 minute e fai ai le su’ega a le tamaitiiti e to’atasi, lona uiga a 50 tamaiti o le vasega, e o’o atu i isi fanau ua lē fia auai i le umi o le taimi e fa’atali ai, ma o se tasi lea o fa’afitauli ua manatu ai le pulega, e sili ona tu’u.”
Ma o le tausaga fo’i lenei o le a amata su’e ai fanau mai le Tausaga Fa ma le Tausaga Lima i le su’ega o le National Exam ae fa’aauau pea su’ega o le S.N.J.S.C. mo le Tausaga 10 (Year 10).
