Tala tuliloa, o loo ,taofia pea i Samoa le tino maliu ole tina polofesa Carolina Sinavaiana Gabbard e faatali le fomai mo le faia o le suesuega faaletulafono faapitoa, e iloa ai le mafuaaga ole maliu.
O le maliu fasia faafuasei ole tamaitai polofesa, ose alo faasino ia Amerika Samoa, 78 tausaga, i eleele o Samoa , ua oia ai sootaga o lagona o tauaiga, uo ma e lalata ile ua maliu afioga a Carolina Sinavaiana Gabbard.
Ua i lima o leoleo molimau, o le suesuega, e le gata o le agaese na maua ae ole samala, o masalomia na faaaoga pei ona faailoa e le Komesina o leoleo, Afioga Auapaau Logoitino Filipo, i ofisa faasalalau.
Peitai o ta’ua e le tatou paaga mai totonu, o sailiga a leoleo na maua atu ai aupega o ta’ua i luga, ma le tino maliu ile fale taele ole maota ole tina 58 tausaga o Samoa, Papalii Sia Figiel, i Vaivase uta.
O molimauina e le tatou paaga, ole tina ia Papalii, e leai sana taavale, e masani ona alu e momoli i mea e mana’o ai, faapena foi i isi ana uo, sa tietie ai foi i a latou taavale.
Peita’i ua faamauina o le taavale lea na ia faaaoga i lea aso na oo ai lana tietiega i Lotofaga, o le taavale a le tamaitai polofesa ua maliu.
Ole faafetai a le tatou paaga, ile aiga Lotofaga na afe iai Papalii ile afiafi ole Aso Toona’i lea na maliu ai Ms Gabbard, ile tali leleia ole mafine ina ua taunuu iai.
Peita’i ile tala mai totonu, e le’i ta’uina e Papalii ile aiga Lotofaga le mea na tupu ina ua oo atu iai ile Aso Toona’i. Ole iloa lava lea e le aiga ile Aso Sa, ma avane ai loa i leoleo, ma iloa ai ole taavale a le ua maliu lea malaga ai Papalii i Lotofaga .
O le oo ane e logo leoleo ile ASo Sa na faatoa faia ai suesuega ma maua ai le tino maliu ma aupega mata’utia o masalomia sa faaaoga, ma isi mea faitino na maua ai ile fale e leoleo suesue.
Ole polofesa 78, ua maliu, le afioga Caroline Sinavaiana Gabbard, ose alo faasino ia Amerika Samoa na lauiloa ai le Teritori o Tutuila ma Manu’a i ana galuega ma ona tomai sili, ua litea.
Ae o Papalii, ua molia , ole matai tina Samoa, 57, na lauiloa ai Samoa i lona ia foi tomai sili.
Peita’i ua talia le faia ole suesuega faapitoa faafoma’i ile mafuaaga o le maliu, ma tula’i ai ile faamasinoga Papali ile aso Lua ole vaiaso fou.
