Ua faamaonia le taofia ai pea e leoleo a Ausetalia (police custody) ni alii talavou se toalua, na malaga atu i galuega faavaitaimi a Poutasi Falealii, i moliaga o le, faaoolima matuiã, faaoolima e fuafua e fasi is oti (assult with the intention to murder), faaoolima e faaoga ai se aupega maai (naifi), faaoolima ua aafia ai ni mãnuaga i le tino (assault with severe bodily harm).
O lea mataupu na to laulau i luma o le faamasinoga i le vaiaso na te’a nei, ma sa talosaga ai alii ia mai le au malaga o galuega faavaitaimi mai Poutasi, i le faamasino, ia ia toe tuu atu se avanoa, ina ia tatala ai laua i tua ma le falepuipui i Tasmania i Ausetalia.
Peita’i na matua’i teena e leoleo o loo faia moliaga, ona o le mau a leoleo (prosecutors):
- O loo tau faaola i le falema’i, se tasi o le aumalaga lava a Poutasi i Falealii, na faaoolima matu’ia i ai ia taulelea.
- Ua faamalolo e le fale faigaluega
- Ua le toe taliaina i totonu o le apitaga, na nonofo ai
- E popole leoleo i nei tatala i tua sosola
- E matua’i popole foi leoleo a Ausetalia, i le saogalemu o tagata lautele, ona o le matuiã o mãnuaga o loo tau togafitia e foma’i i totonu o Ausetalia i le taimi nei.
O loo faaauau suesuega a leoleo i nisi o i latou o loo masalomia.
O le aumalaga lea a Poutasi Falealili, na tuu ai e le toatele o nisi o i latou Ausetalia, ma toe fo’i mai i Samoa nei, i le vaiaso na tea nei, a o loo taofia ai nisi o le au malaga i le fale puipui, ma le falema’i, ona o le ōnãnã, fufusu ai, ma aafia ai se tasi o i latou, o loo tau faaola i le falema’i, pei ona faailoa mai e le tatou sooupu i Ausetalia.
