Taofia tino maliliu o alii se toalua mai Afega ma Vaoala mo taotoga faapitoa

SHARE NOW

Ua faamaonia mai e le sui Komesina le afioga ia Papalii Monalisa Tiai Keti ina ua fesiligia e le leitio Polenisia, e lua tino maliliu o loo ile falemaliu o loo faatalia le faia iai o ni taotoga faapitoa.

O tino maliliu nei e toalua ma o alii uma, o le isi alii e 31 tausaga le matua mai le afioaga o Vaoala ina ua faamaonia mai e lona aiga ile taeao o le a usuai atu i galuega ae faafuasei e pau o lenei alii ma maliu ai.

Peitai saunoa Papalii o loo faasolo lava suesuega a leoleo ina ia maua ni mafuaga o le maliu o lenei alii e aofia ai ma le tama matua e silia ma le 45 le matua mai le afioaga o Afega.

O le tama lea saunoa Papaplii na lipotia mai ile masina Me, ae i suesuega a le itu a leoleo na maua ai na atoa lelei le vaiaso o tau sailia ae mulimuli ane maua atu e lona aiga o loo maliu i totonu o le fale o loo nofo ai nao ia lava.

Peitai saunoa Papalii i le faasologa la o suesuega a leoleo i nei mataupu e lua, e tatau ona faatino ni taotoga faapitoa, ma tālia ai le toe agai mai o le fomai faapitoa mai Fiti lea e masani ona faataunuuina nei taotoga mo Samoa.

O loo taofia tino maliu o alii nei e toalua i le falemaliu i Motootua e talia ai se taimi e mafai ai ona faatino ni sailiiliga.