Tapena Ekalesia Katoliko mo le latou taitai fou

SHARE NOW

E tolu masina lea ua tapenapena ai le Ekalesia Katoliko Roma i Samoa, faapea tauaiga ole afioga i le Akiepikopo fou , mo le taimi ole faauuga pa’ia lea ua faatulaga mo le aso 22 Aukuso 2024.

Peita’i ile tatou faatalanoaga ma le tasi o tauaiga o le afioga ile Patele Mosese Vitolio Tui ile faaiuga o le vaiaso, “ose tapenaga o le’a faia ma le agaga o le faafetai fai a’e e maualuga ai le viiga o le Atua.

Ua maitauina i talaaga o le Ekalesia, le tupuaga a’e o tauaiga ole afioga ia Patele Mosese Vitolio Tui  i le afioga o Safotu Savaii, ose aiga ua lauiloa i faamanuiaga a le Atua, e ala ile faaopopoina o latou Patele ma tama’i sa i le gasologa ai o ana augatupulaga.

Mai lava i ona matua sa galulue faafesoasoani. Peita’i i le talaaga o le faletua ia Agi ma ona uso, e tofu lava le tamaitai ole taauso ma alo e Patele ma Taupousa, faapena foi i lo latou tuagane, le afioga a Tuilo’a Anitele’a Tuilo’a e iai foi ona alo e Patele ma Taupousa. E ui ua tuua le malo e le toatele o lena augatupulaga, , ae o loo tauave pea le tautua lotu a le aiga.

O le afioga a Tuilo’a sa tula’i mai le tofiga faipule ole itumalo o GAgaifomauga numera tasi, e iai Safotu ma Manase  ile 2006 lea ua sui tulaga mai ai le tama a lesi ona tuafafine, le afioga ia Faimalotoa Kika Stowers , ma ua savali ai nei ile 18  tausaga sosoo talu ona umia mai e le aiga sa Tuilo’a le tofi ole itumalo.  

Ole faaeaina ai o le aiga sa Tuilo’a mai le afioaga o Safotu, e le gata o tofiga faaleagaga ae o le tula’i mai paeaiga sosoo o tauave mai e ana tama fanau le tofiga faipule ole itumalo,

Ae o lea foi ua tofia se tasi o alo e avea ma Akiepikopo o le Ekalesia Katoliko Roma i Samoa, ose tofiga e ‘ave iai le faaeaea maualuga a le Ekalesia Katoliko i ona atunuu.

Ole masina fou o Iulai lea ua folafola e sui ole pulega ole Ekalesia i Samoa, ile feiloaiga ma Tusitala ile faaiuga ole vaiaso, e taunuu ai i Samoa le afioga ia Patele Mosese Vitolio Tui mai Niusila, mo lona faauuga faa-Akiepikopo ile aso 22 o Aukuso 2024.