O le naunautaiga o le Matagaluega o Faatoaga ma Faiga Faiva i tuvae mai i laufanua le faama’i o le African Swine Fever, ua lava tapena le au tausimanu i auala e tetee atu i le faama’i.
I se A’oa’oga faatino [Presentation] a le sui mai le Quarantine le susuga ia Asuao Kirifi Pouono, e silia ma le 20 Atunuu o le lalolagi ua mafai ona aafia i le African Swine Fever, aofia ai ma Papua New Guinea.
Na ta’ua e Pouono, o lenei faamai e leai se fofo poo se tui e ona fo’ia ai.
O le African swine fever o se faama’i pipisi e mafua mai i puaa e tu’ufau poo pua’a aivao e leo mafai ona tu’uina totonu o sai,
Na faamalosi ma fautua le Minisita o Faatoaga ma Faigafaiva, le Afioga ia Laaauli Leuatea Schmidt i lana saunoaga autu, le mamalu o le au tausimanu na auai e lologo puialii atu le toatele o tausi manu e lei mafai ona faatasi i le fonotaga ananafi i le Lava Hotel, ia lava tapena ma sauni i le taimi e oo mai ai le faama’i.
“Mo le silafia e tou paia ma mamalu, o lo’o galulue va’ava’alua le malo o Samoa ma le polokalame o le PHAMA Plus, tauala atu lea ile Matagaluega o Fa’atoaga ma Faigafaiva, mo le tapenaina o si o tatou atunu’u ini a’afiaga e ono o’o mai ona o le fa’ama’i mo meatuaolō, o le Fiva Aferika po’o le African Swine Fever, o lo’o a’afia ai atina’e meatuaolō i isi atunu’u o le lalolagi.
“O lo’o fa’agasolo pea galuega asiasi a i latou o lo’o nafa ma le mata’ituina o puipuiga o tuaoi o atunu’u ta’itasi, fa’aaogaina ai le metotia e taua o le risk-based inspection (po’o asiasiga o lo’o fa’atinoina i vaega e ono mafai ona lamatia ai se atunu’u), ina ia tu’uititita ai le avanoa e ono a’afia ai i lenei fa’ama’i o le Fiva Aferika.
“E ono iai fo’i le avanoa e a’afia ai si o tatou atunu’u o Samoa ma lamatia ai tatou atina’e o meatuaolō fa’apea fefa’atauaiga. Afai ae o’o mai lenei fa’ama’i ma fa’atupulaia lautele i totonu o Samoa, e ono o’o atu i se tulaga faigata tele ona tineia.
“E sili atu ona tele lona a’afiaga a’o tatou iai i lenei vaitau o le KOVITI-19, fa’atasi ai ma le lē lava o punaoa o lo’o maua e tali atu ai i lenei fa’ama’i matautia.
“O le Fuafuaga mo Galuega Fa’atino mo le Fiva Aferika mo Samoa, o lo’o taoaofa’i uma ai galuega taua e mana’omia ona galulue ai si o tatou atunu’u ina ia mafai ona maua se faiga fa’atasi atoatoa e tali atu ai i lenei fa’ama’I”.
Ua tutu faatasi uma nei le au fai lafumanu ma le au fai faatoaga e tapena ma sauniuni ao lei ulufale mai le African Swine Flu i Samoa.
