O le aso 30 o Oketopa o le tausaga lenei o lea faia ai le Sulu o le Filemu a le Toomaga mo e puapuagatia lea ua silia ma le 10 tausaga talu ona le toe faatino ina.
Ma atoa ai le 18 tausaga talu ona faatino le Sulu o le Filemu o le faailoga o le tetee atu i Sauaga e faasaga i tina ma tamaitai o Samoa.
Ua maea faataatitia polokalame faagasolo a le Toomaga mo lea faamoemoe tele, e ala i le 10 Aso amata atu i le faaiuga o le masina lenei e faasoo ai le sulu i Samoa atoa.
E tatala aloai lava le Sulu i luma o le Ofisa autu a le Toomaga, ua iai foi sui o le malo ua valaaulia mo le tatalaina o lea faamoemoe.
E 9 afioaga ua faamauina o lea mafai ona malolo ai le sulu ma moe ai ma faatino ai polokalame faapitoa a le Toomaga, seia aulia le isi aso fou ona toe faaauau lea.
Ua iai le faamoemoe o le faaiuga o le vaiaso e malaga ai Savaii le Pulega o le Toomaga o ana paaga o loo lagolagoina le faamoemoe pei o le UN Women, ma sui uma o le latou faamoemoe o loo autovaa mai Niusila.
O le afioaga muamua lava o lea moe ai le sulu o Lalomauga o le Aso lona lua o lea moe ai le Sulu i Matatufu, aso lona tolu o Mulifanua.
Ona malaga lea i Savaii ma amata ai Salelologa agai i Taga ma moe ai i le aso Toanai ma le aso Sa, aso lona 6 faaauau ma moe ai Vaisala, aso lona fitu e pogia ma moe le sulu i Avao.
Ona faaauau lea i le aso lona 8 mai Avao i Salelologa ma moe ai, ma toe malaga mai ai le uafu Mulifanua i Toamua ma malolo ai i le aso lona iva lena.
Ma le aso mulimuli o lea faauau mai ai le sulu mai Toamua agai mai luma o le fale o le malo ma tapunia aloaia ai loa le Sulu o le filemu 2023.
O le auga tutasi lava o lenei faamoemoe ia tutu uma tagata Samoa ma tetee ma taofi sauaga o loo tutupu pea i totonu o le lotoifale o Samoa.