Ua lua ai nei o tausaga talu ona faamanatu ma tatala aloaia le aso faapitoa mo tina ma tamaitai i nuu ma afioaga i tua e aofia ai ma se mafutaga faaleaoaoga e fitoi tonu i tina ma tamaitai fai pisinisi.
E 4 aso o lenei vaiaso o loo faasolo ai lea faamoemoe ma o loo galulue faatasi ai le Matagaluega o tina ma tamaitai ma le Faalapotopotoga o Tina a Malo aufaatasi.
Ma e 40 masini faaketonolis poo tablets ma laptops e 15 na ofo atu e le UN women e fesoasoani i le faafaigofieina o le faatinoina o nei aoaoga.
Na saunoa faafetai le Minisita o le Matagaluega o tina ma tamaitai le afioga ia Mulipola Anarosa Ale Molioo e momoli le faafetai i le fesoasoani a le UN Women e ala i punaoa ua o latou foai.
“O le tausaga lona lua lenei talu ona faamanatuina le Aso Faavaomalo o Tina ma Tamaitai i Nuu i Tua, ma patipatia ai lo latou sao i le atinaeina o aiga ma nuu i le Sini Autu “Patipatia ma Amanaia nafa tausi o tina i atinaega aua le maua o taumafa I le lalolagi”
“O le Aso 15 Oketopa o tausaga taitasi e fàamanatuina ai lenei aso faavaomalo, peitai ona o lenei tausaga sa pa’u i le Aso Sa le Aso 15, o le ala lea ua faamanatuina ai ile aso”
“O le asō o le a tauaaoina aloaia ai foi ni masini faatekenolosi e 40 tablets ma laptops e 15 mo le faatinoina o ni aoaoga mo tina fai pisinisi”
“O nei punaoa o se fesoasoani a le UN Women e tauala mai i le Malo o Ausetalia ma le Malo o Samoa. O le faamoemoe ina ia siitia le tomai a tina faipisinisi i le faaogaina o tekonolosi faaonaponei e fesoasoani l le faatinoina o latou pisinisi.
I le maea ane o le tatala ina o lea faamoemoe na amata ai loa ma aoaoga mo tina o loo faatino atinae i maketi e tolu lea e i Fugalei, Savalalo ma Salelologa i Savaii.
