E lima masini e gaosi ai le kesi ma ogaumu e 10 ua faamanuia ina ai le Ekalesia Papatisoga i Tanumapua na tatala alo’ia le aso, e tauala mai i le fa’a-paaga ma le Faalapotoptoga o Atinae o Malo aufaatasi (UNDP).
Na taua e le faafeagaiga o le Ekalesia le susuga ia Faaofonuu Tautifa Efaraima e $19 afe le tupe na faaalu mo masini e lima, ese mai le $15 afe na faatau ai uaea ma isi mea faigaluega na fausia ai pa o loo si’o ai masini.
Saunoa foi Faaofonuu, na tusitalosaga le Ekalesia le tausaga ua mavae mo ni masini se 17 ina ia tofutofu sia uma le Ekalesia, peitai ane e nao le lima masini na mafai ona maua, ma ua tufatufa atu i matafale e to’afa o le aulotu o loo faia latou faatoaga ma lafu manu.
Ae na ta’ua e le sui o le Faalapotoptoga o Malo aufaatasi oloo tauala mai ai nei poloketi le susuga ia Edwin Tamasese, ua to’a valu ai i le Ekalesia Papatisoga i Tanumapua faalapotopotoga ua mafai ona ofo atu iai le fesoasoani, e tasi Savaii ae fitu o loo iinei Upolu.
Ma o le gaosia o le kesi mai lea masini e faaoga ai otaota o manu sei tulou e pei o moa, povi, mamoe, o valusaga, o lapisi, ma toea’ina mai meaai, e lafoai faatasi i totonu o le masini ma gaosia ai le kesi, ona mafai lea ona faaoga ogaumu mo le gaosia o meaai taumafa,
E 15 tausaga e faaoga ai lenei masini ona mafai lea ona fufulu faamama ma toe amata le gaosia ina o le kesi.
Ma oloo fesoasoani le Ofisa o Faatoaga o loo Vailima po le sapalai atuina lea o otaota ma lapisi o manu aua le gaosiga o kesi,
Saunoa le faafeagaiga e le gata o se fiafiaaga i aiga Ekalesia ae o se faamanuiaga ina ua maua nei masini faamama avega aua ua taugata foi le tau o le kesi ua iai nei.
Ae i le ma’ea ane o le saunoaga a le Faafeagaiga, na saunoa ai Edwin mo faalapotopotoga uma poo afioaga o loo manaomia lenei fesoasoani oloo iai le avanoa e tusitalosaga atu ai i le Faalapotopotoga o Malo aufaatasi mo se fesoasoani.
