Tatala avanoa faigaluega a le Starkist mo fanau aoga Don Bosco

SHARE NOW

Ua faamaonia mai e le alii puleaoga o le laumua o matata eseese o Don Bosco, le susuga ia Fonomaitu Mane Su’a, le maua lea o avanoa o fanau aoga o loo aotauina i totonu o Don Bosco, i le fale fasi’ia a Amerika Samoa le Starkist.

O lea avanoa e tauala mai i le alii pule o le Starkist, ina ua asiasi mai i Samoa i le fonotaga a le atoa o Samoa, lea sa faatinoina i Savaii i le masina o Oketopa o le tausaga nei.

Ma ia ofoina mai ai loa le avanoa mo alo ma fanau o loo aotauina i le laumua o Don Bosco, ma o loo ave le faamuaua mo fanau ua faauu.

Peitai saunoa manino le susuga ile alii pule, o le tausaga lenei ua amata ai ona tatala atu avanoa nei i le au faauu e toa 67.

O le aoga muamua lenei i Samoa ua mafai ona maua avanoa faigaluega faapenei.

Peitai o le faafitauli pei ona taua e Fonomaitu o le leai lea o ni aiga o fanau i Amerika Samoa e faigofie ai ona faamautu ma faigaluega.

Ae ua maea ona tufatufa form poo tusi apalai i fanau nei e toa 67 ua faauu e fai ai a latou filifiliga ma matua i le vaega tonu e tatau ona fai.

Faailoa foi e alii pule i le tatou faatalanoaga, ua uma ona fai a latou tuuga tala ma le kamupani ma faailoa mai o le tausaga fou o lea amata fausia ai fale e faamautu ai iai fanau nei.

E leo faatapulaa mai le fuainumera o fanau loo manaomia, o loo tatala le avanoa i fanau uma o le laumua.

I faamaumauga a le alii pule, e toa 436 alo ma fanau sa amata resitala atu i le amataga o le tausaga, peitai e oo mai i le taimi nei e toe toa 304, 246 o alii ae 58 o le aofai o tamaitai.