Ua talia ai nei e le faamasinoga maualuga le talosaga a Edwin Fanueli na tuuina atu i luma o le faamasinoga i le aso Gafua o le vaiaso ua tuanai atu.
Ina ia tatala o ia i tua e faatali ai le aso 4 o Mati o le tausaga fou e toe laulauina ai loa mau e faasaga i lana mataupu. Peitai o le tatala ai o le alii o Edward i tua ua tuu faatasi atu ai ma ni tuutuuga e ao ona ia mulimulitaia ma puipuiia mai ai o ia mai le faia o nisi soligatulafono, e ona aafia ai ao talia taualumaga o lana mataupu.
O ia tuutuuga e aofia ai le faasa lea ona toe oo i le nofoaga na tulai mai ai le faalavelave, faaoouma i le faamasinoga pepa malaga, faasa foi ona toe fesootai i molimau a leoleo ma nisi o tuutuuga ua maea ona faailoa ai e le faamasinoga maualuga.
Ua silia ma le fitu masina o nofo vaavaaia lava lenei alii i le falepuipui i moliaga o le fasioti tagata.
I le aso 6 o le masina o Fepuari o le tausga lava lenei na teena ai e Edward moliaga e lima a leoleo e faasaga ia te ia.
O ia moliaga e aofia ai le, fasioti tagata faamoemoeina; fasioti tagata paivalea; faaoo manu’a tuga; umia au’pega matautia; ia male umia o se aupega e le faatagaina, peitai o loo ia te’ena uma moliaga ua ta’ua luga I faamaumauga a leoleo o le mataupu lenei.
O ta’ua ai o le faaletonu lea na tupu mai Aleisa i le vaveao o le Aso Toonai a malama le Aso Sa o le Kilisimasi o le tausaga e 2022, ae na faato’a logo mai leoleo i le 2am i le vaveao ma faataalise atu loa iai.
Peitai o loo masalomia o le laau malosi na faaoga e lenei alii e faaoo ai le oti i lana uo tamaitai le susuga ia Mele Lapana sa avaea ma tamaitai malu o le malo.
