O le Aso Tofi e tatala ai le Ofisa o Palota i Savaii , faletalimalo o le Stevenson i Manase mo le lesitalaga o suafa o matai ole itumalo o Gagaifomauga Numera 2 e tauva i le Palota laititi , ole aso 3 o Iuni.
Ae ole Aso Faraile mo Matai tauva e le’i gafatia le malaga atu i Savaii e lesitala lona sui tauva mo le palota laititi.
Peita’i o loo tatala pea le ofisa Palota mo talosaga a tagata e fia palota muamua.
Oi latou ia e aofia ai le matua 65 tausaga i luga, o tagata e iai manaoga faapitoa ma tagata e malaga i fafo, e le’i oo ia Iuni 3 ole palota laititi.
Ua faamauina foi o le aso 1 o le masina fou, Iuni le palota mo tagata palota muamua, ae faatoa faia ai le palota laititi aloaia autu mo le mamalu ole au palota i le aso 3 o Iuni.
O le palota laititi lea a Gagaifomauga lua, e faaaua ai le teuteuga o le tulafono o palota 2021 , e le toe tau faatali se matai agavaa e tauva ile tofi, se atoa le tolu tausaga talu ona matai.
Taimi nei, e ao ona lesitala le matai, ma umia le pepa lesitala ua faamaonia le suafa matai, ma agavaa aiaiga ole avea ai ma sui tauva, e aofia ai le faia o le monotaga faalenuu.
Peita’i mole taimi nei, e le tasi pe lua matai o le itumalo o Gagaifomauga lua o fia tauva i le tofi faipule.
Ua faamaonia mai e le paaga mai le itumalo, e tasi lava le sui o loo ave iai le faamuamua o le FAST e tauva.
E le’o mautinoa se aofai o sui o le HRPP i le taimi nei, ae o matai e agavaa e tauva mo le nofoa faipule ole Itumalo, o le’a iloa ai lava i le faaiuga o le vaiaso nei, lea e tapunia ai le faaulu ma le lesitalaga o le sui tauva.
Ua ala ona toe alo le Itumalo o Gagaifomauga i lana palota laititi, ina ua tuua le malo e lo latou Faipule sa manumalo mai le palota tele o Aperila 2021, Vaele Pa’iaaua Iona Sekuini.
Ua atofa le faletaalo i Tuana’imato mo le mamalu ole itumalo o alala i Upolu nei, e palota ai ile aso 3 o Iuni. Ae mo Savaii, ua atofa foi falepalota i afioaga o le itumalo.
