Ole lona tolu ai lenei o aso talu ona tatala faitotoa ole Maota fogafale tolu fou, ua mae’a ma umusa ai ole Ekalesia Worship center i Sogi.
Ua avea ai ose tasi o fale mata’ina ile taulaga i Apia, ma faaopopo ai se isi foi faletapua’i i totonu o le li’o ole taulaga .
O le malumalu $20 miliona tala, ma lona fausaga ua tu matila mai ai le ese foi o lona ata mai le tele o malumalu i totonu o le tatou atunuu.
Ua faitau tausaga talu ona faasee atu sauniga lotu a le ekalesia i le faletaalo i Tuana’imato, ae fai le latou galuega ua mae’a ai nei ma le manuia, ele au kamuta a Aliki.
O le aulotu foi lea na ave ile faamasinoga e le faletalimalo tuaoi ona ole leo tetele o a latou viiga.
Ma poloaia ai e le faaiuga a le faamasinoga, le maualuga o le leo e tatau ona iai mo lona si’osi’omaga, lalo o le taitaiga a le Susuga i le faafeagaia ia Aposetolo Mafoe Viliamu ma lona Faletua, ia Lavina.
I lona nofoaga i Sogi, pei ona lipotia e le Leitio Polenisia e $2miliona tala na aitalafu mai le faletupe o le ANZ, mo le fanua ma le fesoasoani $100afe tala mai le Susuga a Andy ma Leone Forsgrens. .
E oo atu i le 2afe tagata e mafai ona ofi ile vaega pito i lalo e mo sauniga lotu, ae o le fogafale i luga ae mo ofisa, ma le pito i luga e mo le pulega ma fonotaga a komiti.
O le Afioga i le faletua, Mrs Mafo’e na ia ooti le lipine ole maota ma saunoa faafetai ai iai latou uma na fesoasoani i le galeuga, sa lei faigofie ae o le faatuatua ile Atua ma lana taitaiga ua taunuu ai le faamoemoe.
Ole sauniga e tatala aloaia ai le Maota, ile Aso Toonai na valaaulia ai le Afioga i le Taita’i ole malo, le Palemia, Afioga Fiame Naomi Mtaaafa ma sui ole Kapeneta, faapea le taittai ole itu agai, Susuga Tuilaepa Sailele Malielegaoi.
