O le tapueina ma le maopopo o le gagana Samoa le isi lea anavatau e taunapa ai tele le Matagaluega o Aoga ma Aganuu, e aofia ia le gagana tautala, tusitusi, ma le faitautusi e pei ona molimauina ai le tatala aloaia o le lomiga lona 11 o le tusi Samoa Nei Galo.
Ua i totonu uma o lenei lomiga le ‘oa o le gagana, tala o le vavau, tala tuu, alagaupu ma muagagana aemaise o le aganuu, lea ua inumalie ai laupepa o le tusi, o le Samoa Nei Galo, i lona vaega 11.
O le nei galuega na amata mai i le tausaga 2021, a’o soifua se tasi o Toe Ulutaia o le Matagaluega na iai le sao ile nei galuega ia Mataafa Elia Autagavaia.
E 10 afioaga na aoao manogi mai ai le aufaigaluega, e lima mai Savaii, faapena foi i Upolu.
E iai fuaitau a le atunuu ua aloaia le faasa’oina ma le suia, ua i totonu o le tusi ma o le a faaaoga mo le aoaoina o le Mataupu o le Gagana Samoa i aoga uma.
E ese mai i lena, na faalauiloa ai foi ma ata o le ausiva a faiaoga mai le tausaga 1972 e oo mai i le 2023, ma amanaia ai foi le sao o Toa ia o le galuega faafaiaoga.
O le afioga i le Minisita o le Matagaluega ia Seuula Ioane Tuaau na saunoa i le saunoaga autu o le polokalame, ma na auai ai sui o soavaega o le vaega o aganuu a le Matagaluega e pei o le itu o Mataaga, o Aganuu faapea le Gigiliulaofatuga, aemaise i latou na valaaulia.
