Toe lua masina o loo totoe ona saoloto loa lea o le malaga asiasi atu a tagata Samoa i eleele Pa’ia o Isaraelu, e aunoa mase toe talosagaina ose visa.
Peitai e mana’omia lava e Samoa ona faamalie aiaiga faalevaomalo, poo visa e sopoia atu ai isi atunuu o le lalolagi, faato’a oo se asiasiga ile Nuu Paia.
O le feagaiga lea ile va o le malo o Isalaelu ma Samoa, ua savali le lima tausaga talu ona sainia e le Palemia o lena taimi Tuilaepa Sailele Malielegaoi se maliega i Ierusalema, ile 2018.
Peita’i ole masina na te’a nei o Aperila na maua mai ai se faamatalaga aloaia mai le Amupasa o Isalaelu, ua ma’ea gaioiga faalelotoifale , e faataga ai ona malaga asiasi atu tagatanuu Samoa i Isalaelu ma nofo e le silia ile tolu masina.
Ole umi foi lena ole taimi masani o loo ave e le malo o Samoa i tagata e asiasi mai ile tatou atunuu. O Isalaelu na 15 iai atunuu sa aumai a latou fesoaosani o fomai, ina ua pesia Samoa ile misela ole 2019-2020.
Faatasi ai ma aoaoga, i matata eseese, pei ole soifuamaloloina, o taumafa tatau, faatoaga faapisinisi, faamalosiau i tamaitai ma isi. O le 2018, na alu ai le malaga faapitoa a tusitala o le Pasefika, e 13 e aofia ai ma Samoa, ole taimi muamua lea talu ona tutoatasi ua alu ai se malaga faapea e molimauina le nuu paia.
Ae ole 2022 na alu ai foi lesi aumalaga atu a le Pasefika, mo aoaoga tau faatoaga, e 10 usufono atu i Matagaluega o Faatoaga ma le Ofisa o Suesuega faasaienitisi a Samoa na malaga ai.
Na saunoa ai foi le afioga ile Palemia, Afioga Fiame Naomi Mataafa ile feiloaiga ma le Amupasa fou ole malo o Isalaelu I Samoa, e talosia ai le manuia ma le agaiga i luma o lenei faapaaga.
