Mai ise pepa o faamatalaga mai ile Matagaluega o Faatoaga ma Faigafaiva lea na faailoa mai ai le mafai ona faatinoina ai lea e le Matagaluega o Faatoaga ma Faigafaiva (MAF), ile galulue so’oso’otauau ai ma le vaega suesue Faasaienisi o Samoa (SROS) se aoaoga mo le gaosiina ma le teumaluina o fatulaau.
E oo atu ile to’a 30 sui auai sa mafai ona auai ile aoga i Upolu faapena foi ile motu tele i Savaii.
Ole auga ma le faamoemoe autu o lenei aoaoga ina ia faalautele ai le silafia e le gata ile aufaigaluega aemaise le au faifaatoaga i auala ma metotia eseese ile gaosiina ma le teumaluina o fatulaau (Open Pollinated Seeds).
Sa faatino ai foi ma le folasaga a le Vaega Suesue Faasaienisi (SROS) i iuga o nisi o a latou suesuega sa faatino i fatulaau sa auina mai ile Matagaluega.
E taua tele le mauaina ole silafia ma le tomai e faatatau ile nei galuega, ina ia fa’a-a’upegaina ai o tatou tagata ia mafai ona ausia tulaga manaomia e le gata ile maketi ae faapea foi le fofoga taumafa ole atunuu ma ia faamautinoa e maua pea i taimi uma.
