O le afioga i le Minisita o Tupe Mulipola Analosa Ale Molioo na saunoa e tatala aloaia le Ofisa o le Fonofaavae o le Itumalo o Vaimauga tolu, ile Aso Toona’i.
E lata i le 100 taitai ma totino matutua ose vaega o le Itumalo na auai e lagolago le faamoemoe, ma auai atu iai e sui o le malo i Minisita ma sui Minisita ae o faafeagaiga e faapa’ia le ofisa ua mae’a.
Na tamua i le sauniga o le faafetai ma le faapaiaga e le faafeagaiga o le Itumalo i Vailima, Susuga Salafa Tasi.
Ma tatala aloaia ai e le afioga i le Minisita , o Tupe, Mulipola Analosa:
“E faamoemoe le manuia o le itumalo pe’a lelei ona lufilufi ma lelei le faipule. Le komiti ole fonofaavae o le itumalo, ma le aufaigaluega e fesoasoani mo atina’e talafegai a le itumalo.
“E tele lu’itau, ae ia loto tetele ma faamoemoe i le Atua e manuia ai faamoemoega uma. Ia faamanuia tele le Atua i lenei galuega, ia fai ma punavai e puna mai ai manuia, ma le sosia o atinae eseseese ina ia manuia ai aiga, ekalesia, nuu ma le Itumalo . Ma ua tatala aloaia ai nei le ofisa ole Itumalo o Vaimauga tolu mo lona faaaogaina.”
O le tala o le tupe o le galuega, poo le $200afe tala muamua lea na faamatuu i itumalo, e tapena ai o latou ofisa ma totogi ae ole aufaigaluega e toatolu ma le alauni a le 15 o le komiti..
Na saunoa iai le Susuga Veatauia : “Manatu ou te le fia alu i le Vaa o Faalaeo, faimai e pisa le ao, pisa le po. Ou te le fia folau foi ile vaa o Laulu aua faimai na tagisia ia goto ini figota se tele. Oute le fia pei foi o Meto tagivale, aua na tagi ia Alo e fia fau sona fale e lau i ula ae pou i toa, fau fau i a’a o le aoa.
Manatua lenei taeao na liugalua, ua matagofie le saunoaga ua pa’u mai le afioga ile tamaitai Minisita o Tupe, Mulipola Analosa. Sa le faigofie lena vaitau, aemaise i faipule o le HRPP, ina ia taumafai e o gatasi tasi ma ta’iala ma faiga faavae aua le faatautaiga ole Poloketi nei.
Ae ui o lea na fale lava i le fale o le Atua le finagalo o le alii faipule, ma ua alu suaga o le Vaatele, ma finagalo malie e faamaopopo loa le Komiti. Ae ole Komiti lenei a Vaimauga tolu, pei ona silafia, na fetogia’i faa soi o tua’oi ma featofa’i faa niu o tua’oi.
Alu i luga alu i lalo. Na matua umi lava o faia se fefaloa’iga, ma feaveao e peau o tala ma galu upu.
O lea ua tu le ofisa o Vaimauga tolu. O le tau o le galuega, i le tino o le fale, e $129,000tala ae le’o aofia ai le anofale. “
O le uma ane o le faapai’aga o le ofisa, ma tufatufa atu ai koko toto, i le aofia na auai, ae o pepa o fatulaau.
