Ua maua ai nei le mapusaga o aiga i le motu tele i Savaii, e fia faatino ni a latou galuega atina’e pei o fale fou, ina ua tatala ai ile faaiuga o le vaiaso nei, le Ofisa tumau o le PUMA Planning and Urban Management Agency, i Salelologa, poo le Vaega lea e Pulea galuega fou e faatino i soo se vaipanoa o Samoa.
Pei ona saunoa iai le afioga i le Minisita o Galuega tetele, Olo Afoa Fiti Vaai ina ua tatou fesiligia ai i nisi nei o auaunaga mana’omia mo atina’e fai ale atunuu o nonofo i Savaii.
Tatou maitauina ole tolu ai nei o tausaga talu ona faasee ane le Aufaigaluega lea a le PUMA mai le Matagaluega o Oa Faanatura ma le Siosiomaga, ile Matagaluega o Galuega a le Malo, ae o lea ua faato’a faamautu ai nei sona ofisa tumau i Savaii. O le ofisa tumau lea o le’a fesoasoani ile siitia o atinae fai ma talosaga mai le atunuu e silia i le afe i le tausaga mo pemita e faatino ai galuega.
