I faagasologa o mataupu o le faamasinoga i le amataga o le vaiaso nei, sa aofia mai ai ma le mataupu o le alii o Fialelei Vaifale, 21 tausaga mai Samalaeulu, lea sa ia faaoo le maliu i le taulealea o le afioaga o Fogapoa 22 tausaga, e maupaolo atu i Samalaeulu, ae o le faaletonu lea na tulai mai i le amataga o le tausaga nei.
O le talia ai la e le faamasinoga o le talosaga a le loia lea alii le susuga ia Alex Su’a na alai ona tatala Fialelei i tua e talia ai le faagasologa o le mataupu.
Peitai o aiaiga o loo tatala ai lenei alii ia tauaao uma atu ana pepa malaga, saini i le ofisa o leoleo i le Aso Lulu ma Aso Faraile o vaiaso taitasi, ia nofo i Vaiusu ma aua nei toe oo i Savaii, seia maea lelei le mataupu o loo molia ai.
Ma ua faatulaga e le faamasinoga le Aso 19 o Fepuari e toe tulai ai lea talavou, ma tuuina mai ai sana tali i le moliaga o le fasioti tagata faamoemoeina.
