Saunoaga a le afioga i le Minisita, Leota Laki Lamositele mo le tatalaina ole Ofisa Fono Faavae Lotofaga;
O lea ua tuta I nuu manaia le Sa o le Talalelei e pei ona fita I tuga iai le Susuga I le Taitai o le sauniga. Ua logo foi I tulupae o le nofoalii o le Mataisau le feau taumomoli o lenei taeao. Faamalo le folafola I lau Susuga I le fa’afeagaiga.
O tala I lo tou Afio’aga ua ta tu lili’a i le to ae maniti tino I pisaga. AIsea?
Ona o lea ua nofoia Sua e auoloolo I le paia ma le mamalu ua sasao nei.
Le susu o lau Susuga I le Taitai o le Sauniga faapea fa’afeagaiga taulagi o so’o se fata faitaulaga. Afifio ma Alaalata’I le paia maualuga o lo tatou itumalo aua le Afio o Fiame o le Sa’o Faapito ma Salevalasi. Alalatai Faatili ma Lemauga. Susu Sitagata ma le Aiga SaSitagata o le vaa na taumua lasi I faigamalo ma le mamalu I le Faleātua. Aea Samoa ua potopoto I ona mamalu ma ona paia maualuga ua lipoi I Mulifusi ma Tanumaleu nei. Tulou! Tulouna lava!
O lenei aso ma lona faamoemoe ua o tatou penei ai e le toe tau faamatalaina. Aua ua logo ‘I logo ‘A ona tala. E talitonu foi le lagona ua nofofale ia SaTuiama’a le anoliu atoa o lenei taumafaiga taua.
O le tatalaina aloaia o lenei galuega matagofie I lenei aso o se faailoga lea o la outou lagolago ma le galulue faatasi. Ua tumātila ma mamalu aua e lē gata o le itumalo o le Tamaita’I Palemia ae a fofola le siapo lautele o Samoa, o le itumalo na mua I paia o Samoa.
Faamalo lo outou fa’aea I lo tou tofi vae ane le tofi Palemia. Faafetai lo outou puipui I la outou tama fa’apelepele e ala I le faatinoga o lenei galuega ua molimauina. O lea ua silamio Samoa ma le vala’aulia I le asō I lo tou faiva ua laulau sasa’a. E moni lava o oe o le Aiga Paia, e te tausi tupu e te tausi tapa’au ae e te fa’aēa ma fa’amamalu tupu.Atonu ai o le ala lea na fa’afaigata ai ona matu’u le finagalo o le tupu ina ua sau le amiga o ia mai ona aiga,ona ua malie le loto ma mata e vaai I la outou galuega. Manatu e faapena se lagona I lenei aso.
Faamalo le galue! Faafetai mo lenei galuega matagofie ua tatalaina I le aso, le Ofisa tutotonu e faatino ai galuega aua ana fuafuaga mo ana atina’e manuia.
Ua maea ona faataoto e le malo faiga faavae ma taiala e lima taitaiina ai lenei polokalama matagofie ma olo’o ō gatasi lelei ma le fuafuaga fa’ataoto a lo tatou itumalo (DDP 2022-2026).
Ua maea ona filitupetoa le tatou itumalo I sui auai o lana fono faavae aemaise o le au faigaluega e tautuaina le fono faavae. E ioe le taofi ua malu le fa ma o toa nei ole a avea ma mua’au tau e foeina lo tatou sa ina ia folau ma le faatuatua. O le mea lea le tatou itumalo , aua toute tu’ulafao’ai I le tatou fono fa’avae.
Aumai la outou lagolago ma le fa’atuatuaga o galuega ua fuafuaina ma fa’ata’atitia e le tatou fono faavae e manuia ai lo tatou itumalo nei ma le lumana’i. O le tele o popo e sua ai le lolo ae o le tele foi o sulu e tamaoaiga ai le tatou faatamasoali’iga I figota.
O le upu masani a le atunuu e leai se faiva e ‘asa ma se ma’umau ma o le faiva alofilima lava foi o le tagata o le sese. O lenei foi taumafaiga o se mea e fou I lo tatou ola ma le soifua mai ma o le mea mautinoa e iai le taimi e sese ai le tagata. Ae faamoemoe I le tofa ma le moe a le tatou itumalo e tou te faapalepale ai ma faufautua I mea e faaleleia atili ai le tatou galuega. Ia aua nei vale tuulimaina nei manuia ua tuuina mai.
Ia faamanuia le Atua i faamaite ma fuafuaga ole a tupuga mai lenei maota. Ia avea ose laumua e taula’i mai iai soo se tagata ole itumalo oloo manaomia le fesoasoani, ose laumua e fola i le tofa ma fetalaiga e lufilufi tutusa ai faamanuiaga mo tagata ma aiga ole itumalo.
E le faaituau, e le faailoga tagata ae ose laumua e siomia ile alofa e pei ole alofa mutimutivale ole Atua ua tatou molimauina i lenei aso. O ni atina’e ole a faamaite mai lenei polokalame ole a faaitiitia ai le mativa ma le le tagolima i nisi o aiga i totonu ole itumalo, ole a faaitiitia ai sauaga i totonu o aiga, ole a faatumau ai se siosiomaga saogalemu i totonu o tatou nuu, ma le tele o nisi taunuuga lelei ole a tatou ausia pe a faatonutonu ma le toto’a lenei faamoemoe.
E momoli atu le faamalo ile paia ole au valaaulia faapea le mamalu eseese ole itumalo oloo faatasi mai e tatou te molimauina lenei galuega matagofie.
Oloo tatou faatasi foi ma sui ole matagaluega a tina ma tamaitai, atinae o nuu ma alalafaga ma aga fesoota’i oloo lagolagoina le faatinoga o lenei polokolame. Ua iai se vaega faapitoa ole matagaluega ua gafa ma lenei polokalame ma o i latou ia ole a tou galulue faatasi e faamalosiau mai ile faatinoga o tou fuafuaga mo le tatou itumalo.
A tuuama le fua ma taape le fili alii, ia puipuia e le Atua mamana lau afioga le sa’o faapito, faapea faafeagaiga taulagi ma le mamalu ole tatou mafutaga ia outou ala ia taunuu ma le manuia ile tapuaiga a aiga oloo faamuli mai. Ia faapea ona sao ma uli le tatou faamoemoe i lenei aso.
Soifua
