Ole agaga ole galulue faatasi lea na ave iai le faafetai faapitoa ma le faataua ale Minisita o galuega tetele, Olo Afoa Fiti Vaai, ina ua saunoa e tatala le fasi auala 24kilomita le umi, ua lima tausaga o faufau atu i Saina, e oo i Faleolo. Ole galulue faatasi lea na saunoa iai Olo, ole onosai o taavale feoai ao faatino galuega, ae o aiga ma faleaoga, o pisinisi, ofisa o malo ma falesa i tafaala ile pao ma le pefu, i lena 5 tausaga ua mavae atu.
Ole auga ole atina’e, ia tali atu ile saoasaoa ole soifuaga o aso nei, vave ona faatino galuega fesoasoani, aemaise ole fasi auala lea oloo numera silia le tele o taavale e uia, e sootaga ile malaevaalele ma le uafu ile va o motu.
Ua fetaui foi ma le taligamalo i ta’ita’i o malo ole taupulega, CHOGM ia Oketopa.
Ole auala ile afioaga o Fagaloa lesi lea auala sili ona tausi gata ma faigata i kamupani fai auala ona tausi faaauau talu e le gata ole toe, a’ega, mauga ma le fepiopioa’i ae o sologa mai le itu mauga, e lamatia ai tele o taavale o soo se ituaiga ma tagata femalagai ile atu Fagaloa.
Peita’i ole galulue faatasi lava lea na saunoa iai le afioga ile Minisita ia Olo Afoa Fiti Vaai, e taua tele mo Samoa.
Ole vaiaso nei lea na molimauina e lei iai se faataua o lena galulue faatasi ina ua toe lalaga i luga auala ta i Fagaloa ele masini pa’u filifili a se tasi o kamupani.
Na taua ele matai poto faapitoa i galuega tau auala, e iai foi lana masini pa’u filifili fai auala, sa tatau ona faatietie le pa’u filifili i sona ia lava loli e ave ai ile nofoaga olea faigaluega ai.
Peita’i e iai le kamupani sa latou faia ma tausia mai auala i Fagaloa, na molimauina e lamatia tele le avega o masini fau auala i Fagaloa.
Saunoa le pule ole SWELL ole auala na ave ai le latou masini pa’u filifili i lalo, a’o galulue ai sa faasavali atu lava i luga i pa’u taavale sa le faigofie, e le tasi se aso e taumafai atu ai lena galuega, ole la’u o pa’u taavale i ala pa’u ole masini pa’u filifili ina ia sefe le auala, sefe le soifua ole aufaigaluega, o taavale feoai, ole taimi alu ile toe faiga ole auala, ma faasao qi tupe a le atunuu.
Peita’i ole auala lea i Fagaloa, e pese ai pea lona faipule ile palemene, talu le motusia i tafega, e poloka e sologa mai le itu mauga, ae o vaega maulalo ole auala, e aia mai le sami i suiga ole tau ma tafia ai le gataifale.
Na molimauina foi e le ATA-MUA NEWS i auala lava ia i Fagaloa ile tausaga talu ai, na sua ai se vaega o fanua mauga i tafaala mo galuega ole auala.
Ole galulue faatasi ole kamupani e ana ia le masini pa’u filifili lea na afaina ai le auala o Fagaloa ile vaiaso nei, lesi lena manaoga taua ole Minisita o galuega tetele, Olo Afoa Fiti Vaai.
Peita’i ole tausiga faaauau o auala tetele e le taugofie, pei ona molimauina i totonu ole 5 tausaga, e $115 miliona tala na toe faaleleia ai le aualatele mai Saina i Faleolo.
Ose galuega na amata mea mai ai le malo a le HRPP, ile 2019, ma faatupe faaauau mai e le faletupe ole lalolagi.
Ole faatupeina e aofia ai le totogi o konekarate fau auala, o tagata tomai faapitoa, ma fanua o aiga ua faalautele atu iai le auala i Faleolo, ua taunuu manuia lena atina’e ona ole agaga ole galulue faatasi.
