O le asō ananafi sa tauāluga ai le usugāfono a Mālō e lua auā matā’upu mo le soifua manuia o tagatanu’u o Amerika Samoa ma Samoa.
O le fonotaga, sa soālaupule ma fa’ata’oto ai ālāfua po’o ta’iala e ala i le maliega tusitusia ua saini ‘ā’ao ai Ta’ita’i o Mālō e lua, e lima ta’ita’iina ai le fa’asologa o auaunaga ‘ese’ese ua mālilie i ai itu e lua, e fefa’asoaa’i auā se manuia lautele o nai o tatou tagatanu’u.
O ia auaunaga e aofia ai le itu tau tamāo’āiga, soifua mālōlōina, a’oa’oga, feso’otā’iga fa’aneionapo, femalagā’iga, fa’ato’aga ma faigāfaiva, fefa’atāu’āiga fa’apisinisi ma isi.
Na saunoa le Palemia o Samoa le afioga Fiame Naomi Mata’afa ile tatalaina ole fonotaga e faapea ua taumua lelei le Matāutu, ma lalago fa’atasi lenei fonotaga ma le fa’amanatuina o le 60 tausaga o le Mālō Tuto’atasi o Samoa, o lo’o fa’amanatuina i le tausaga atoa. O lea fo’i e mātau atu, o le ulua’i taimi lenei ua toai taunu’u mai ai lau afioga i le Ali’i Kovana i Samoa nei, talu ona pale mai lau faigāmālō i le mae’a ai o le faiga filifiliga a Tutuila ma Manu’a.
Ona manatu lea, o le a tautalaaso ma molimau lenei feiloā’iga i le tula’i mai o lau afioga, fa’apea fo’i le faigāmālō a Samoa nei.
O la tatou folauga o le fa’atuatua ua autausagā. Ae tatou te mau fa’atasi, o lo’o fa’atonu folau le Atua e ala i lona Agaga Pāia, ina ia maua’a o tatou so’otaga o Samoa na lua i le fetausia’i ma le feoeoea’i, ae lautua i le alofa ma le fīlēmū moni.
Sa o tatou mua’i feiloa’i i le masina o Iulai i le la itu o le tatou Maota tele i Tutuila. E toe lalaga ma saga matimati le fa’amausalīina o so’otaga vāvālalata o Mālō e lua. O le agaga mauāluga, e ui ina ‘ese’ese o ta faigāmālō, ae e lē ‘ave’esea o ta so’otaga na fa’avae e o tatou tuaā ua lagomau mai i tiasā, o Samoa o le ‘āiga. Ma e sili ona mafanafana le toto nai lo le vai.
O le va feagai ai o Samoa e lua, lea ua o tatou fa’ailo o le ‘ATOA O SAMOA’, e fa’apitoa ma tulaga ‘ese i tulaga fa’avāomālō. O le agaga iā te a’u nei ma le faigāmālō a Samoa, ina ia avea la tatou fonotaga o le ‘Atoa o Samoa’ tatou te nutimea fa’atasi ai, ma soa le pule, mo le manuia o Amerika Samoa ma Samoa nei. Ma fa’aauau pea lo tatou feta’aloloa’i i le alofa ma lo tatou fealofani.
Ou te talitonu, e telē le sao o le fonotaga lenei e fa’atonu folau ai lo tatou aga’i atu i le lumana’i, aemaise le mafai ona tatou tali fa’atasi atu i lu’itau ma’ale’ale i vala uma o le atina’e o le tamāo’āiga ma le soifua manuia, ma le saogālēmū o ō tatou tagata.
Ua le’o toe faigofie nei aso. Peta’i o le mau a Samoa, o sulu e tele e maua ai figota, ma suati le ola auā tupulaga lalovaoa, ma ē e le’i soifua mai. O nei e fau mau ai taeao. O uo i aso uma, a’o le uso moni, e tula’i mai i aso vale.
Ia alofa mai le Atua i le amataina o la tatou fonotaga i lenei aso, ma a taeao. Ia auāli’itia mea uma e lona agalelei.
