Ua faafetaia ai e le Taitaifono o le Fono Faatonu, a le SVSG Toomaga mo e Puapuagatia, afioga a Georgina Lui, le faapaga a le Toomaga ma le Malo, e ala i fesoasoani tupe.
O tupe e alu tonu lava mo le galuega, ole faaititia o sauaga faasaga i tina ma fanau teine.
O ta’ua ai e le Taitaifono, o ia tupe o le’a fesoasoani ile saga faalauteleina lea o le galuega puipui a le SVSG poo le Toomaga.
O le polokalame lea ua aumai iai le lagolago a le malo, o loo taulamua ai alii poo tamā foi, e aofia a ma tamā i le malo, o totonu o nuu, o aulotu, o aoga, e oo lava i le au faatau oloa i magaala.
O le polokalame ua aofia ai tagata uma ae ose matafaioi faitele, ua le na’o le SVSG.
Peitai ua toe faamanatu mai le laina telefoni, 800 7874 mo fesoasoani e vili fua mai le Vodafone poo le Digicel 24 itula e iai lava le tagata e tali atu.
Na ia faamanatu foi, mo le atunuu e fia fai sona sao i le polokalame lenei, ia fesootai ane i sui o nuu, aulotu, aoga ma autalavou o loo faagaioi mai ai.
E galulue faatasi mo le faaititia o sauaga faasaga i tina ma tamaitai.
I tupe faasoasoa a le malo , afa miliona na atofa e tuuina ile Toomaga mo e Puapuagatia, peita’i e le’o avea uma iai lena vaega tupe i le taimi e tasi, ae o lo o auaua’i iai.
E le’i tali mai le pulega o le Toomaga o iai nei, ina ua tatou fesiligia ini a latou polokalame faatitia mo le faaaogaina o le vaega tupe muamua.
Peita’i i tatou sailiga na iloa ai e le’o iai se faaititia o le tatagi a le telefoni 800 7874 mo fesoasoani, afua ona o sauaga faaaua pea i totonu o aiga.
E aofia ai ma tina nofotane ma latou fanau.
Taimi nei, e toalua tina o loo taofia ai ile maota faapitoa lava na fausia e mapu atu iai tina ma fanau o aafia mai sauaga i aiga mo se taimi le tumau.
A’o faia ia suesuega a leoleo ma le pulega o le Toomaga.
Ole faaafetai maualuga a le PUlega o le Toomaga i ana faapaaga mai fafo, aemaise o le tatou atunuu, i le au faipisini, tagata taitoatasi, afioaga ma ekalesia i fesoasoani, e le gata o le tausiga o aso uma ae ole faamalosi’au.
E silia i le 50 fanau mai le pepe i le 18 tausaga oi totonu o le lotoa, e talia ai taunuuga faaletulafono o latou mataupu.
Ae le’o aofia ai fanau, ua le toe mamanao ai o latou aiga, ma fanau ua matata’u e toe foi i aiga.
O le seleni ua faamanuiaina ai le Toomaga, pei ona ta’ua i luga, afa miliona, ole taimi muamua lea aofia ai le Toomaga i le tufatufaga o tupe faasoasoa faaletausaga a le malo.