Ole tele o faalavelave faalenatura lea ua amata fotua’i mai i lenei lalolagi e mafua mai lea i suiga maaleale ole tau i lea tausaga ae e leo tuua ai le galuega faifaipea ma le taulogologo a le Matagaluega e ala lea ile faaauauina pea o nisi o polokalame faalauiloa mo aoga i fuafuaga mo faalavelave matuiā mo aoga i Upolu, mai ile Aso 29 o Aukuso ole tausaga nei.
Mai ise pepa o faamatalaga mai ile itulau a le Matagaluega o Punaoa Faalenatura ma le Siosiomaga, lea na latou faailoa mai ai le faatautaia ai lea e le Matagaluega e ala atu ile vaega o faalavelave matuiā faatasi ai ma le Matagaluega o Aoga ma Aganuu (MEC) se polokalame faalauiloa ile aoga tulaga lua a Si’ufaga e faata’ita’i ai a latou fuafuaga mo faalavelave faafuase’i 2024-2034 ma siitia le malamalamaaga i lamatiaga e ono lamatia ai.
Ole sini autu o lenei polokalame faalauiloa ole, faamalosia ma siitia le silafia e faiaoga ma tamaiti aoga i lamatiaga e faamata’u ai a latou aoga. Siitia le malamalama ma le tomai o faiaoga ma le fanau aoga i auala e puipuia ai, ma le tali atu ile taimi e tula’i mai ai faalavelave faafuase’i. Tuuina atu metotia talafeagai e faamautinoa ai le saogalemu o aoga ma siosiomaga mo tamaiti aoga ma le aufaigaluega.
Na faamae’aina lenei polokalame ise faata’ita’iga ile taimi e tupu ai se mafui’e ma le galulolo ma mata’ituina le tali atu i taimi e tula’i mai ai nei faalavelave faalenatura.
Na faateia e le Matagaluega o Punaoa Faalenatura ma le Siosiomaga le malo o Ausetalia e le gata i lo latou sao taua i lea polokalame oloo faagasolo ae ole faatupeina o lenei polokalame, e tauala mai ile poloketi a le TAUTUA faatasi ai ma le lagolagosua mai le Matagaluega o Aoga ma Aganuu.
