Ua i laufanua poo le uafu i Matautu le Container X-ray Scanner a le Matagaluega o tiute ma tupe maua, sa faatupe mai e le Faletupe o Atinae a Asia, le Asian Development Bank e pei ona faamaonia mai i le pepa o faamatalaga.
Na auai le Minisita o le Matagaluega le afioga i le sui Palemia ia Tuala Tevaga Iosefo Ponifasio e molimauina le toai taunuu mai o lenei masini ua silia ma le tausaga o faatalia pea.
Na auai atu foi i ai le susuga i le tamaitai Pule Sili le Afioga Fonoti Talaitupu Li’a-Taefu, le sui o le kamupani mai Saina, o faauluuluga ma alii ma tamatai ofisa o le Matagaluega, o i latou uma nei na molimauina le taimi na aveese mai ai le Container X-ray Scanner mai le vaa na aumai ai.
Peitai ua iai le faamoemoe o le Matagaluega o le maea ai o le fausiaina o le warehouse o loo faia nei, ona faatoa amata faaaoga ai loa lenei masini.
O le faafetai a le matagaluega i le Faletupe o Atinae a Asia faapea le Malo o Samoa mo le latou fesoasoani ua mafai ai ona maua mai lenei masini e matuā tele le aogā mo le puipuiga o le atunuu aemaise lava i ona tuaoi ina ia mautinoa o loo malupuipuia mai soo se mea e ono sao mai i totonu e lamatia ai le saogalemu o le atunuu, e pei o fualaau faasāina, o auupega lē faatagaina ma isi.
