E 11 le isi vaega o pisikoa lea na taunuu mai i laufanua o Samoa ile po anapo ma faia ai le ava o le feiloaiga ile fale Samoa o le Matagaluega o Aoga Taaloga ma Aganuu ile taeao o le aso.
O nei pisikoa ua faaopopo ile isi vaega e toa iva lea na taunuu mai ile amataga o le tausaga nei ua maea a latou toleniga ma ua galulue nei i aoga ua tofia e le Matagaluega o aoga e galulue ai.
Peitai o le taunuu mai o pisikoa e 11 nei mai Amerika na faafeiloai aloaia ile aso o loo tauala mai lea i lalo o le faamalumaluga a le Matagaluega o aoga.
O isi piskoa e toa 3 o loo i totonu o le vaega lea e toa 11 o alo ma fanau Samoa na feola ae i Amerika Samoa ma agai atu mo aoaoga e sootaga i lalo o le polokalame o pisikoa, ma o so latou sao taua foi lea mo le atunuu ina ua maua le avanoa e tautua ai e ala ile valaauina ua totofi ai.
Faatoa toe amata lea ona aumai pisikoa talu mai le misela ma le Koviti ile tolu tausaga ua mavae, o le auga male faamoemoe o le auina mai ai o nei pisikoa.
Ia fesoasoani lea ile pitolaau a faiaoga e ala lea ile faitau tusi ma le tusitusi, o alo ma fanau aoga ae o nisi foi o matupu o loo manaomia ai le iai o se faiaoga.
Aua o se tasi lea o faafitauli tele o loo faafesagai pea ma le Matagaluega o aoga, o le utiuti o le aufaigaluega pei ona saunoa iai le faatonu sili le susuga ia Aeau Christopher Hazelman i se tasi o feiloaiga ma tusitala.
“O le toatele o nisi o faiaoga ua faamavae ona ua maua avanoa i nisi o Matagaluega a le malo, o nisi ua agai atu mo aoaoga faafaifeau i Piula, Moamoa ma Malua”
Peitai e taunuu mai ai le isi vasega o pisikoa e toa 30 ao lei maea lenei foi tausaga 2023.
