Tusa o le tolu i le afiafi ole Aso Lua i Amerika Samoa 10 o Aukuso 2022, ole Aso Lulu i Samoa nei ananafi, ae amata loa ona faalogoina e tagata o loo nonofo i motu o Ofu ma Olosega i Manu’a le galulu ole fogaeleele.
Ma fautuaina ai loa le nofouta o tagata o Ofu ma Olosega ise falavelave faafuase’i.
Aemaise o le lipotia ai o foliga afuafua ose mauga mu i le alititai lalata i motu o Manu’a, le Vailuluu.
O le mauga mu afuafua lea o loo mapu’epu’e ane ile va o le motu o Ta’u ma Rose Atoll, ma e le’o mautinoa sona tulaga poo sesi laasaga, ae ao lava ona nofo uta iai.
Pei ona lipotia mai Amerika Samoa, O Fepuari o le 2017 na asia ai e le au suesue a le NOAA, ma le VAega Suesuega ole Moana o Amerika Samoa, na maua ai le mauga mu lea o Vailuluu i le alititai ole moana, i vaega i sasae o Samoa.
