E lima moliaga a leoleo lea ua i luma o le faamasinoga e faasaga i le alii o Edward Fanueli.
Na fofogaina i luma o lana Afioga Justice Ameperosa Roma i le faamasinoga maualuga i le taeao o le aso.
E aofia ai le, fasioti tagata faamoemoeina; fasioti tagata paivalea; faaoo manu’a tuga; umia au’pega matautia; ia male umia o se aupega e le faatagaina.
Peitai o loo te’ena uma e le oloo tu’ua’ia Edward Fanueli moliaga ua ta’ua luga e faasaga ia te ia.
O Edward oloo taofia pea i lalo o le vaaiga a leoleo , ae ua oo atu lana talosaga i luma o Jutice Roma i le aso e tauala atu i lana loia, susuga ia Leiataualesa Jerry Brunt, mo se faatanaga e tatala ai o ia i tua.
Ma ua faatonuina ai e le Faamasino Justice Roma e toe tula’i i le aso 15, aso Lulu o le vaiaso fou, mo le fofogaina ai lana talosaga pe talia pe leai.
I faamaumauga a leoleo o le mataupu lenei, o ta’ua ai o le faaletonu lenei na tupu mai Aleisa i le vaveao o le Aso Toonai a malama le Aso Sa o le Kilisimasi 2022, ae na faato’a logo mai leoleo i le 2am i le vaveao ma faataalise atu loa iai leoleo.
O le amataga mai o le mataupu lava lea sa feagai ai ma leoleo o le ofisa o leoleo i Faleata. Peita’i na saunoa afioga ile sui Komesina Papalii Monalisa, na toe faasee ane le suesuega i le ofisa autu o leoleo i Apia.
Ae o le suesuega a leoleo, o iai masaloga, o se laau malosi na faaaogaina.
Ma o le aso 28 o le masina o Aukuso o le tausaga nei lea ua tuu atu i ai e fofoga ai moliaga a leoleo e lima pei ona ta’ua i luga talu o loo teena e Fanueli.
Ae o le aso 15, Aso Lulu o le vaiaso fou, e iloa ai le talia o lana talosaga, e tatala ai i tua.
