19 Tesema, 2014 Samoa: O loo teena e le ofisa sili o le matagaluega ole Soifua maloloina Professor Aiono Doctor Alec Ekeroma lona sainia ose faasalalauga faalauaitele mai le latou Matagaluega, o tusia ai se faaupuga faapea ua severe pe ua ogaoga tele ma le lava o fomai ile falemai tele i Motootua, ua afua ai le taofia o gasegase tausavali e le tigaina sei usu lelei atu ile taeao o lesi aso, 8am – 8pm.
Ole faasalalauga lena na mulimuli ai le lipoti a le Samoa Observer.
Pei ona molimauina mai ile fetufaaiga ile va o le Minisita o le matagaluega, afioga a Valasi Togamaga Tafito Seleele, ole tamaitai tusitala o le nusipepa Afioga a Matai’a Lanuola Tusani Tupufia ma le Ofisa sili o le Matagaluega, Aiono Dr Ekeroma.
O saunoa ai le minisita e fia malolo foi foma’i, o isi foi tagata soifua.
Ae o saunoa le CEO e sese le faaaogaina o le upu severe poo le ogaoga ole le lava o foma’i, ona o lae faigaluega lava, ae o loo ave latou taimi malolo.
Peita’i e ese mai le faasalalauga na maua e lau leitio Polenisia.
Na tatou lipotia atu ananafi 18 Tesema, le faalauiloa i luga o le itulau a le Matagaluega o le soifua maloloina, o loo faailoa mai ai ile gagana peretania ma tatou faaliliu atu i lalo:
“Ua amata ai nei talu mai le aso 16 o Tesema ile aso 5 Ianuari, ona tapunia avanoa mo gasegase tau savali mai le 8pm ile 8am.
Vagana ai gasegase tigaina ma faalavelave faafuasei, e vaaia ile taimi lena.
(Ae o isi gasegase e le tigaina ua fautuaina e o e vaai foma’i tumaoti pe toe usu atu ile taeao ole aso e sosoo ai, 8am ile 8pm.)
Ole faaaliga mai le itulau a le Matagaluega o le soifua maloloina o taua ai, ua faaititia itula e tatala ai mo gasegase tausavali, ona ua ta’i 12 itula ole sifi a’o faasolo atu i aso malolo o le Kilisimasi ma le tausaga fou.
