Ua le taliaina e le faamasino ole faamasinoga faaitumalo, Leota Raymond Schuster. Le talosaga ale alii faasalalau e nofomau i Ausetalia, Tiumalumatua Maifea Fetu, e faaleaoga moliaga a leoleo faasaga iate ia.
O moliaga a leoleo na afua mai le tagi ale failautusi aoao a le FAST, ile taufaaleaga ile malo o lafoga ma faasalalauga faalauaitele i luga fesootaiga televave na faia e Tiumalumatua i luga o ala faasalalau.
O le uma ane ona teena e le faamasino ole talosaga, ma ave ai le avanoa 10 minute i itu e lua e tapena ane ai mo le faaaauga ai loa o le faamasinoga poo le mataupu lenei. Ole molimau muamua a leoleo na valaau, o le failautusi aoao a le FAST Susuga Vaaaoao Alofipo.
Na molimau Vaaaoao, o faamatalaga tau faaleaga na ia vaai iai i luga o le facebook. o faasalalauga sa faia mai i Ausetalia e Tiumalumatua. Na faaola le tv screen ma faaali ai se vaega o poloalame a Tiumalumatua lea e talitonu le itu a leoleo o loo solia ai le tulafono e le o tuua’ia.
E amata ona ki ma faaali le polokalame ae o atagia foliga ataata o Tiumalumatua ma le tasi na la nonofo faatasi i le nofoa i luma.
Na tula’i le loia a le itu tetee ma talosaga i le faamasinoga o le polokalame lea e 6 itula le umi, pe mafai ona faaali na’o le vaega o iai le molimau.
Ma sa faapena lava ona faasino e leoleo le vaega tonu o le polokalame o loo iai le latou molimau. E afa ane le 11, ae o loo matamata faamasinoga i luga o le tv. ose vaega o le molimau a le faialutusi a le FAST Vaaaoao.
Na ta’ua e le Vaaaoao o lona tiute lea ose failautusi o le mata’itu o tulaga uma e sootaga ile ta’ulelei ma aafiaga foi o le vaega faaupufai a le FAST, ina ia faaauau ai pea le filemu ma le ta’uleleia ole vaega faaupufai, ua tofia mai e le Atua e taitaia lo tatou atunuu.
