Ua le talia e le Faamasinoga o Mataupu toe iloilo le mataupu a le susuga ia Iliganoa Daphne Sapolu o le faletua o le sa avea ma Faamasino sili le afioga ia Patu Falefatu Sapolu.
O lenei mataupu ua maea ona faia iai le faaiuga a le Faamasinoga Maualuga, o le faaiuga na faamaonia ai sa iai le Uili na faia e Patu ao lei maliu, peitai na matuai teena e Iliganoa e faapea e leai se uili na faia e lona toalua ao soifua.
Ma auamai ai loa e le Faamasinoga i tua le tali o le mataupu ile masina o Tesema o le tausaga ua mavae 2022
Peitai na toe apili e Iliganoa le mataupu e faaali ai sona manatu e faapea e sese le faaiuga a le Faamasinoga, ma finau ai na sainia faamalosi e le tuafafine o Patu sa avea ma loia i le tele o tausaga le susuga ia Luamanuvao Katalina Sapolu lenei uili.
I le taimi tonu lea o loo taofia Patu ile maota gasegase, faailoa ile kopi o le faaiuga o lenei mataupu o le isi itu o le molimau a Iliganoa o le mafuaga na fai faamalosi ai e Katalina lenei uili, ina ia ave ai le tele o aseta a le toeaina i le atalii o lona uso sa fai ma a la tama le susuga ia Maka Sapolu.
Faamaonia e le faamasinoga na iai le uili mulimuli a Patu lea na ia ave i lona tuafafine e saini ao lei oo ile aso e tuua ai Samoa ae malaga atu i Niusila mo siigama’i.
Ma ua faatonuina e le Faamasinoga o Mataupu toe iloilo e totogi e le itu tagi le $5,000 ile itu tetee.
