O loo tuuaia e le pulega o le Poloketi miliona tala, le faipule o le itumalo o Faasaleleaga Numera, 5, Peseta Vaifou, ile to’alia o galuega atinae a lona itumalo.
Ma saunoa ai le Minisita o le Miliona, Mulipola Anarosa Ale Molioo, ole faamuamua a le Poloketi o le manuia o tagata ole itumalo.
Na faatoa faamatuu atu ai ia Ianuari le vaega mulimuli ole miliona muamua a Faasaleleaga #5.
O faaletonu o le miliona a le itumalo lea pei ona maua i suesuega a le komiti ile saunoaga a Mulipola, ole taulamua lea o le faipule, o avea ma taitaifono, ile faaaogaina ole latou 200afe tala muamua e sua ai le fanua. Ae o le tupe na avatu mo le ofisa, ma faatupe ai totogi o tagata e toatolu mo le ofisa, ma alauni ole komiti e toa 15 a le itumalo, vagana ai le taitaifono o le faipule.
O atagia e le na’o le pau lea o le faipule ole HRPP, o loo faalogogata i ta’iala ole miliona tala, ma to’alia ai faamanuiaga mo tagata lautele.
Ole itumalo lea o Faasaleleaga 5, e tusa o le 1,200 ana tagata palota lesitala ole 2021, e toatolu matai sa tauva mai ai ma sa felata’i lava le taunuuga, ae na palota silia ai le afioga a Peseta.
Peita’i saunoa le Minisita o le poloketi miliona, Mulipola, i mafuaaga sa manatu ai le Komiti Faafoe e aveese le faipule mai le taitaifono, ae tagai ile manuia o tagata lautele ole itumalo.
E le’i maua se tatou avanoa ile faipule ia Peseta, ae o agia lona teena o le aveesea o ia mai le tofiga taitaifono.
