Ua teena e le Faamasino o le Faamasinoga Maualuga le talosaga a le alii o Edward Fanueli e tatala ia i tua mai le falepuipui i Tanumalala.
O le talosaga na valaau ile vaiaso ua mavae e tauala atu i lana loia le susuga ia Leiataualesa Jerry Brunt.
Saunoa le Faamasino: Justice Tuala Warren, o le Faamasinoga Maulaluga, “o loo ia teena le talosaga. Peita’i o taualumaga o lenei mataupu, o le’a fofogaina i le aso 28 o Akuso 2023.
Ae mole taimi nei pau vaega e mafai ona faalauiloa e le au faasalalau o le teena ai o le talosaga. Talu faaeteetega i famaumauga o lenei mataupu o loo taatia mo le taimi taupoina e valaau ai.
Ma na ia saunoa foi e mafai ona aumai ai i luma le talosaga tatala ale itu tetee i le aso lena, e valaau ai le faamasinoga autu.
Ua savali ile lua masina talu ona taofia Edward Fanueli i lalo o le vaaiga a leoleo, ma o loo ia teena uma moliaga a leoleo faasaga ia te ia.
O moliaga e sootaga i le maliu ose tamaitai leoleo i le aso 24 o Tesema 2022. E oo mai i le taimi nei o loo taofia pea le tino maliu o le tamaitai i le falemaliu o le Tupua Tamasese Meaole i Motootua, e talia ai le foma’i faapitoa mo suesuega faaletulafono, e iloa tonu ai le mafuaaga o le maliu.
I lalo o le tulafono faavae 9 (3) e leai se isi e ta’u salaina ise soligatulafono vagana ai ua faamaonia faaletulafono.
Ae mo le taimi nei, o loo taofia ai pea Edward Fanueli i Tafaigata mo lesi ono masina e faato’a iloilo ai lana tetee i moliaga a leoleo e sootaga i le maliu ai o tamaitai leoleo.
