I mataupu o le faamasinoga i le amataga o le vaiaso nei, na molimauina ai le teena malosi e le taulealea, lea na faaoolima i le ave taavale la’u pasese i Tuanaimato i le masina ua mavae, o moliaga o le taumafai e faaoo le maliu i le isi.
O le faaletonu lea sa tulai mai i le masina o Ianuari i Tunaimato, ina ua taumafai le alii talavou lenei e faoo le maliu i le ave taavale ina ua leai se seleni e totogi ai le pasese.
Mulimuli ane faaoolima i le tama e faaaoga ai se tamai naifi, gaoia le ato tupe ma pasese o lena aso a le tama ave taavale 49 tausaga le matua.
Ae o le iloa atu e tagata o loo taaalo i le malae taalo faalevaomalo i Tuanaimato na mafai ai ona maua se laveaiga mo le tama ma faananati atu ai i le falemai
O loo tatala nei i tua le na taulealea i aiaiga masani a le Faamasinoga, e tālia ai se aso o le faamasinoga.
E tatau ona nofo mau o ia i Vaitele Fou, ma saini i le ofisa o leoleo i Faleata i Aso Lulu o vaiaso taitasi.
Ua tuuina mai fo’i e le Faamasinoga se tapu (curfew) e faasa ai ona toe fealuai o ia mai le 4 i le afiafi (4pm) seia taina le itula e 6 le taeao (6am).
Ua faatulaga le masina o Mati e toe fofogaina ai lenei mataupu.
O le tamaitai loia iā Lucy Sio Ofoia o loo tulai mo lē tamaitiiti o loo molia nei.
