16 Tesema 2024: O sauaga o le tau faavalea lea oloo pologa ai se vaega o aiga, aemaise ai i le itu tau femalagaiga, ma faatauga ga taavale.
Ae ole maona ane o le igoa ole tasi tina talavou oloo ia faavalea tagata e fai lona ofisa malaga.
Ole tina lea ua le faatasi ona ia faavalea tagata i le faiga o pepa malaga, ma faotaga a latou tupe.
Ae o ta’ua e le ofisa malaga na solo ane iai tagata e faasino sese iai e lea tamaitai, ole faateia o le ofisa, ona ua le faitasi ona tuumaulalo e lea tina le ofisa malaga.
O le vaiaso talu ai na oo ane ai se tama o loo faatali pepa liliu o lana fanau ua uma ona ave ile ofisa malaga ma ua uma foi ona faaulu atu ile Faamasinoga.
Ae o le taimi lava na tietie ai le tina taufaavalea lea ile taavale a le tama, ma ia ta’u atu iai , o le ofisa malaga lena e fai ai pepa liliu o lana fanau e le faamaoni. Ae o ia e faigaluega ile Ofisa o le faamasinoga, e tasi lava le aso e faatali ai maua pepa vaetama o lana fanau. Ma faapena ai lava ona ave iai e le tama lea le tupe e silia I le $2,000tala ia vave ai ona maua ane se tali.
Peita’i ua fiu le tama lea e tatali le tina, alu atu ile Faamasinoga, e leai se isi faapela e faigaluega ai.
Ole tamaitai tau faavalea lava lea, na aafia ai foi se aiga ile vaiaso talu ai, ua tapena le suavai a le latou tama malaga.
Ae tolotolo atu lava e le tina lea le taimi, ae alu momoli le tusifolau ise tasi o ofisa malaga e masani ai i Apia ma talosaga iai e faatope le visa ole tama ua taunuu le pasese.
Peita’i na maua ane e le aiga ole tama malaga le faaauau ai ona pelogia o le latou aiga ele tina lea.
Ma iloa ane ai foi, ua faitau afe tupe ua uma ona lafo mai Ausetalia ile faagaioiga ole visa ma le pasese ma faotaga e le tina taufaavalea.
Ole faaiuga foi o le vaiaso talu ai, na maua ai foi le ova a le tasi o alii sa ave iai faatuatuaga e lona pule I galuega faatino a se tasi o Ofisa malaga i Apia.
Ae uma ane ua fai foi ana ia faiga visa, faanana mai le pule ole Ofisa malaga, ma o atu le aiga ile malaevaalele, ae le faamaonia le visa na ave e lea alii ile aiga na ia faia pepa malaga.
Ole tala lata mai o tusifolau ma pepa fanau ae o tupe a se vaega o le au faigaluega faavaitaimi lea na tapena mo Ausetalia, ma tolo tolo mo ni masina e oo mai nei, e lei totogia lava le tele o tupe a tagata na aafia ai i lena tau faavalea ase alii talavou mai Fagalii.
Ae ua ia folafola i tagata o loo ia taofia pea tusifolau, e iai malaga lae taumafai e tuu iai latou.
Peita’i o le taimi nei, ua lafo i fono faavae a itumalo tagata e o faigaluega faavaitaimi.
O lesi foi tina o tatou taofia lona suafa, na ia faavalea foi se tama faifeau mai Niusila, e nate okaina taavale, ma totogi iai le tupe e silia ile $10afe tala e oo mai nei, e leai se taavale.
Ma lesi foi tina na ia faavalea foi matua ose alii e faigaluega faavaitaimi e nate okaina taavale, ma totogi foi iai le tupe a na matua, ae foi mai le atalii, e leai lava se taavale.
O le fautuaga masani lava, vaai ma fesilisili mose fesoasoani a’o lei totogia se tupe tele i tagata ete le iloa.
Ae o le tama lea na faavalea ile liliuina o pepa o lana fanau e le tina taufaavalea, ua malamalama mulimuli ane, ae ua tuai, e silia i le $2afe lana tupe ua goto ai.
