E faitau miliona tupe a le malo e le’o maua mai, talu le tele o aiga o loo aitalafu o latou fanua e le’o totogi lisi, pei ona saunoa le Minisita o Fanua o le malo, afioga a Toesulusulu Cedric Schuster, i luga ole tv2.
Ma ua faataoto le polokalame e tuufaatasi ai eleele ole malo, ile saunoaga a le Minisita, pei o le Esetete tausi, Samoa Land Corporation, ma fanua oi lalo o le matagaluega o le Siosiomag ama punaoa faanatura.
Ua maua e le faigamalo o iai nei, ile saunoaga a le Minisita e tele tagata ua mana’omia fanua, ae ova ma le afe talosaga o iai i matagaluega nei e tolu o taua i luga.
Peita’i o maitauina, e iai tagata e fia maua ni fanua, ae e iai foi tagata e tele fanua o iai, ae leai se mea o faia iai, ae o isi ua le totogia fanua.
O lesi faaletonu lea ua iloa ane nei foi, ile molimau a le Minsita, o le eseese o lisi, ma o latou totogi, mai lava ile Esetete tausi, ile SLC, ile MNRE.
Ma ua tagai ai le malo e faatulaga matagaluega fou o eleele ma fuagafanua, e tuu faatasi iai eleele o le malo, ia tasi le tau, faatulaga le vaega lea aua nei toe iai le lape lea ole tele o talosaga.
Ua tagai ai le malo ia tasi se fuafuaga faataatia mo na fanua o le malo, poo se plan, pei o le iai oni aoga, falesa ma atinae mo tagata e nofoia.
