Ua o faatasi ai nei le faamaite a le Palemene o Samoa ile faalauiloa a le Fofoga Fetalai ole Maota, ia laei uliuli faipule i Aso Tofi e pa’u iai ana aso fono, ma le taumafaiga a le SVSG, i Aso Tofi foi, E faatau faapitoa ai ana ipukeke poo cup cakes.
E tasi lava le taunuuga ma le faamoemoe o ia faamaite o le Aso Tofi, ina ia faailoa atu ai le lagolago i galuega e faaititia ai sauaga faasaga i tina ma fanau i Samoa.
O ananafi na laei uli ai faipule, ae o ananafi foi e oo ile 200 cupcakes na taulia uma i le $2 ile keke.
Saunoa ai le Peresetene o le Toomaga, Siliniu Lina Chang, O le sao lena ole aiga o Robert ma Lote Savelio ole afioga o Fasitoo i sailiga tupe a le Toomaga mo e puapuagatia o loo faia nei, o tupe uma lava e maua, e mo le faaauauina o le auaunaga i le campus of Hope.
Peitai ole aso Tofi o le vaiaso fou o le’a 400 cup cakes, e kiliva atu i lou ofisa mo sau fesoasoani.
Taimi nei e lata i le 70 tamaiti o tausia ile Campus of Hope, fua ile tele o moega ma avanoa ole fale, e ese mai tina ma fanau sauaina o loo tausi ai foi ile lotoa e faatali ai a latou mataupu ile faamasinoga.
I le uma ane o le aso fono ole aso tofi na faafetaia ai e le afioga i le fofoga fetalai, Li’o Papalii Taeu Masipa’u le maota ile lagolagoina o le faamoemoe ile laei uliuli i Aso Tofi, ae e fagasolo ai pea i isi taualumaga a le fono o lumanai.
